انا مش بعرف اتعلم مع نفسي 

– انا مش بعرف اتعلم مع نفسي
– لا، انت متعلمتش ازاي تتعلم اصلا …ولا مع نفسك ولا مع ناس
– طيب ما الناس كلها بتتعلم عادي
– طيب ما هما كل اللي بتقول عليهم اتعلموا طالع عين اللي جابوهم في الحياة برضه، يعني انت شايفهم مرتاحين قوي علشان تقيس عليهم
– طيب ما في ناس منهم بتنجح قوي وبتححق انبهارات
– دول اللي اتعلموا ازاي يتعلموا
ازاي شخص في كل المراحل اللي كان المفروض يتعلم فيها
كانت معايير نجاحه اللي بيحاسبوه عليها
* في “الحضانة” انه “يزعق”
* في ابتدائي انه يجلد الكراسة والكشكول بنفس اللون اللي طلبوه منه
* في اعدادي وثانوي انه ياخد دورس مع المدرس والا هايكره في ام المادة
* في الجامعة انه يشتري ملازم الدكتور والا يخلي امه تنفعه
دا غير ان كل اللي حواليه بيعملوا ايفينتات يأكدوله انه مش هايشتغل باللي بيتعمله
ولو شكيت في اي لحظة في المنظومة ككل ورجعت “لاقرب” الناس ليك وهما اهلك و اشتكيت ليهم هيتقالك انت بتقول كده علشان انت فاشل، ما هو اخوك/ابن خالتك شاطر وبيذاكر ومبيعترضش علي حاجة
كل دا من غير ما اتكلم عن ان كل شخص بيحب ايه وبيكره ايه،
وايه الحاجات اللي بيعرف يعملها بسهولة من غير تعب وايه الحاجات اللي بيطلع عينه و بيعاني وهو بيعملها …
عايز يطلع بيعرف يتعلم ازاي

– وبعدين
– ملهاش حل تالت
# ما هو يا اهلك بيقفوا جنبك وبيعترفوا بفشل المنظومة ككل ويساندوك لشخصك من صغرك ويرددوا عليك انك مهما عملت مش فاشل، ممكن تعمل حاجة فاشلة…لكن انت مش فاشل
# يا تعترف انك متعلمتش اصلا علشان متشيليش نفسك توقعات انت مش قدها وتفشل فيها بجد وتفضل طول عمرك فاشل وتحاول تبدأ علي نظافة

– طيب ما احنا كد هاندخل في loop اننا بنعمل حاجات ومش بنحط توقعات، فعملنا او معملناش مش مهم… وبالتالي عمرنا ما هانتقدم
– لا، وفر لنفسك عوامل انك تتعلم صح الاول وحط اهادف مناسبة لمرحلتك التعليمية ….مرحلتك التعليمية مش عمرك،
انا ميفرقش معايا انت عندك 15 سنة او 30 سنة او 55 سنة شوف انت اعترفت انك متعلمتش امتي و ووفرت لنفسك الفرصة صح امتي
وابدأ احسب من وقتها
– وانا اتعلم ازاي صح
– اول حاجة متسألش السؤال ده لشخص، لان كل كل شخص تجربته مختلفة…فخلي استئلتك كلها سمعية مش استرشادية
متسألش حد وتقوله قولي اعمل ايه، لانك هاتعيد الهبل اللي عملوه معاك بس بشكل مختلف
اسأل انت عملت ايه… اسمع منه بس، فكر في اللي اتقال و اوعي تمشي ورا تجربة حد وانت مغمض