مشكلة تقليل نسبة وصولك لمتابعين صفحتك على الفيسبوك

بما انى فى ناس كتير بتشتكى من موضوع ان الفيسبوك مش بيخليك توصل لكل متابعين صفحتك على الفيسبوك ..واغلب الناس بتتفق ان الفيسبوك “مستقصدهم” خلينا نوضح بعض النقط
تعريف الوصل لمتابعينك
Reach
هو عدد الناس اللى شافوا البوست “كل بوست لوحده” ..الفيسبوك مقسم الناس دى لـ 3 انواع
Organic
ودا عدد الناس اللى بمجرد ما تعمل كل بوست بيوصلهم
Paid
ودا عدد الناس اللى بيشوف البوست بتاعك من خلال الاعلانات
Total
هو مجموع الناس اللى شافت البوست اللى نشرته ..بغض النظر شافوا البوست فين
Newsfeed, Ads or Ticker
اغلب الناس بتابع رقم الوصول او من خلال تحليلات الفيسبوك الموجودة على صفحة الفيسبوك ..ونادرا لما تلاقى حد بيعمل تحميل للبيانات ويتابع التحليلات بجد  

دى بعض النقط اللى الناس “اللى عملوا تجارب على الموضوع” اتكلمت عنها بخصوص الموضوع ده:

 لو انا عندى 3 معجبين بصفحتى او ما نشرت بوست 2 منهم شافوا البوست ..وبعدها بساعتين الشخص الـ 3 شاف البوست وراح عمله شير ..والاتنين اللى شافوا البوست فى الاول شافوا البوست تانى ..كده بناء على الرقم اللى حضرتك بتتكلم عليه انت وصلت لـ 5 اشخاص
على الرغم من انك فعليا موصلتش غير 3 اشخاص. #1

لو انا مثلا متابع لصفحتك ..وانا عندى 3000 صديق ..لو انا نشرت البوست من صفحتك على صفحتى ..و 300 صديق ليا “مش متابعين لصفحتك”  شافوا البوست ..انت ممكن تعرف مين من متابعينك شاف ومين غير متابعينك وشافوا البوست من تحليلات الفيسبوك ..طيب لو فى 50 شخص منهم اتفاعل معاك وعملولك
People Talking About This “PTAT”
هل دول متابعين ليك فعلا ولمنتجك/خدمتك ومهتمين ..ولا مجرد تفاعل مرة وخلاص ..حضرتك هاتعرف منين التفاعل جالك منين ..من متابعينك ولا متابعين متابعينك..مع الاخد فى الاعتبار ان رقم التفاعل اللى الناس بتكلم عليه بيجمع كل البوستات ..يعنى لو نزلت بوستات سياسية او رياضية وحصل تفاعل كبير عليهم ..هايتحسبوا على رقم التفاعل #2

تعرف انك تقدر تعلم
Hidden Posts
ودى بتبقى بوستات “موجهة لناس معينة او لكل اعضاء صفحتك” البوستات دى مبتظهرش على صفحتك لكن بتروح لمتابعينك من ضمن المحتوى اللى بيشوفوه عادى “بيتعامل زى البوست العادى فى الوصل للناس” بس الفرق انه مبيظهرش على صفحتك على الرغم من لو جه علىه تفاعل هيأثر “زى اى بوست” على تفاعل صفحتك. #3

النقطة اللى كل الناس بتكلم عليها ان الفيسبوك بدأ من شهر 12 تطبيق الموضوع اللى اعلن عنه فى شهر 8 انه هايقلل نسبة وصول بوستاتك لمتابعينك ..دا صح ..بس السبب زى ما وضح الفيسبوك برضه فى نفس الموضوع انك لازم تنتج محتوى جيد وتنشره فى اوقات معينة وتكون بنيت علاقة مع عملائك ..وناشر موضوع الناس تحب انها تنشره ..ساعتها هتلاحظ زيادة فى معدل وصول بوستاتك لنسبة اكبر #4

بناء على النقطة رقم 4 ..الفيسبوك قال فى المؤتمر ان كل شخص بناء على عدد الصفحات اللى هو عملها لايك وعدد اصدقائه ..المفروض يشوف 1500 بوست كل يوم ..وبما ان دا مبيحصلش ..الفيسبوك عامل معادلة انه هايخترلك افضل 300 بوست ..ومن عوامل الاختيار ان الفيسبوك لما صفحة تنشر بوست معين يروح لعدد من الناس “نسبة صغيرة من النسبة الصغير اللى بتوصلها حاليا” وميحصلش تفاعل عليها …دا هايخلى الفيسبوك يوقف انتشار البوست دا ..حتى مش هايكمل نسبتك الصغيرة كلها..وينشر مكانه بوست عملته صفحة تانية “وصل لنسبة صغيرة برضه, بس اتفاعلوا معاه” ..فدا يستحق الانتشار اكتر من الاول. #5

بناء على الخمس نقط اللى ذكرتهم ..وعلشان الموضوع ميبقاش اطول من كده …ودون الدخول فى تفاصيل
– متابعينك موجودين امتى على الفيسبوك
–  نسبة الصفحات اللى متابعينك متابعين ليها
– درجة اهتمامهم وتفاعلهم مع الصفحات التانية “ممكن مثلا حد بيحب صفحتك ..بس بيحب الكورة اكتر منها” وبيتفاعل مع صفحات كورة بشكل كبير ..ساعتها هايروحله محتوى من صفحات الكورة
– وغير الفيدباك السلبى “ان شخص يخفى البوست او يعمل ريبورت او نسبة كبيرة تلغى متابعتها للصفحة” وتأثير الكلام ده عليك

الخلاصة:
الفيسبوك هدفه الاساسى هو التفاعل مع الناس فى الحاجات اللى هما مهتمين بيها واللى المفروض بتختار منها اللى بتتوافق مع منتجك/خدمتك ..فكرة انك بتعمل محتوى “من وجهة نظرك رائع وجذاب” دا مش دليل على انه فعلا رائع وجذاب!
لو المشكلة فى الوصول للناس ..اعمل اعلان وشوف كام واحد هايشوف البوست  وكام واحد منهم هايتفاعل معاه وقولى النتيجة كانت ايه؟
الزتونة: الهدف من وجودك على الفيسبوك هو تحسين منتجك/خدمتك وعلاقتك بالعملاء ..انت كنت بتقيس ده ازاى ..والمشكلة “زى ما بتقول” لما حصلت والنسبة قلت ..اثرت عليك قد ايه؟

Social Media Trainer/Social Business Strategist Helping you build your online identity through Social Media

التعليقات مغلقة.