شتيمة “عبيد” الترافيك والتفاعل…حرام، حرام، حرام

خلينا نقسم الموضوع لكام نقطة نوصّل بيها الموضوع:
– مين هما عبيد الترافيك والتفاعل؟
– ليه عبيد الترافيك والتفاعل بيعملوا كده؟
– ليه شتيمة عبيد الترافيك والتفاعل حرام؟
– ايه اللي المفروض يحصل؟

– مين هما عبيد الترافيك والتفاعل؟
مبدئيا – في مجال الـ Digital Marketing – كلمة ترافيك traffic بنقصد بيها دخول الناس علي موقع/صفحة علي الانترنت،
والتفاعل Engagement هو التفاعل “مثلا” علي الفيس بوك سواء بـ لايك/كومنت/شير
فلما بنتكلم عن “عبيد الترافيك والتفاعل”
بنقصد اي شخص/شركة/ او حتي صفحة فيس بوك بتعمل اي حاجة سواء علشان تدخل الناس علي لينك لموقع/صفحة معينة او علشان تزود التفاعل علي صفحتها…سواء كانوا من ضمن الـ “Publishers او الناشرين” زي كتير من المواقع الاخبارية او من اللي بيتقال عليه “Content Creators صانعي محتوي”
وفكرة بيعملوا اي حاجة هنا مقصود بيها انهم فعلا بيعملوا اي حاجة حرفيا.

– ليه عبيد الترافيك والتفاعل بيعملوا كده؟
الـ Online Revenue Streams او الطرق اللي ممكن تكسب من خلالها اونلاين كتيرة، بس الفكرة الاساسية ان بيبقي فيه “Advertiser او معلن عنده شركة/منتج/خدمة/فكرة عايز يوصلها لعدد من الناس،
فبيروح لحد من الـ Publishers او الـ Content Creators علشان يوصل للناس اللي بيقروا/بيتابعوا الموقع ده او الشخص ده وفي المقابل بيدفعلهم مبلغ معين.
انا كمعلن هادفعلك بناء عليه ايه؟
يا اما بمبدأ “الاعلانات” او فكرة الـ Reach الوصول
مبدأ الاعلانات اشهر انظمتها هما
– نظام اعلانات اسمه CPC او الدفع مقابل النقرة:
يعني الموقع بيكسب لما الشخص يضغط علي الاعلان،
فهتلاقي مثلا مواقع كتيرة – خاصة مواقع التحميل والمنتديات – بتحط لينكات كتييرة في اي صفحة بتدخل عليها بحيث لما تحاول تحمل اي حاجة ممكن تضغط علي لينك “بالغلط” وتفتح صفحة قدامك..فكده الموقع كسب من خلال ضغطك علي اللينك ده…حتي ولو كنت دوست بالغلط
– نظام اعلانات تاني اسمه CPM او الدفع مقابل الظهور:
يعني الموقع هايكسب بمجرد ما الاعلان يتعرض قدام مجموعة من الناس، احنا هنا مبنتكلمش انك تشوف الاعلان اصلا…انت مثلا فتحت صفحة موقع تقرا خبر معين…وانت بتقرا الخبر كان فيه اعلان علي الشمال مثلا…مش شرط تكون اخدت بالك منه اصلا، بس بما انه اتعرض فهو كده اتحسب Impression او ظهور للاعلان ومع كل عدد معين من الظهور، فصاحب الصفحة/الموقع بيكسب
– فكرة الـ Reach مبنية بشكل كبير علي مواقع التواصل الاجتماعي،
وهي انك تبلغ المعلن ان اعلانه هايوصل/هايشوفه عدد معين من الناس
المفروض انك كمعلن او صاحب شركة/منتج/خدمة توصل للـ target audience او العملاء المستهدفين فقط…
بس في عك كتيير بيحصل ومحدش بقي يدقق..فكله بيمشي حاله.

الخلاصة انت كمعلن هاتروح لحد شخص/شركة/صفحة لو هايوصلك لعدد من الناس وتدفعله في المقابل فلوس.
ودا السبب اللي بيخلي عبيد الترافيك والتفاعل يعملوا اي حاجة حرفيا علشان يزودوا عدد المتابعين والمتفاعلين معاهم باي طريقة،
حتي لو الطرق دي هاتخلي “مثلا” الموقع ينشر اخبار كاذبة او متفبركة او ينشر فضائح لناس
اي حاجة المهم الناس تدخل علي الموقع فعلي الاقل “يظهرلهم” الاعلان واكسب
او هاتخلي شخص سواء كان بيكتب/ بيصور حاجات حلوة يتحول لـ “الة” ويكتب/يصور حاجات كتييير ملهاش اي لازمة لمجرد انه يبقي بيكتب ويصور حاجات علشان يزود المتابعين والتفاعل حتي ولو هايطلع يشتم/يتريق علي ناس تانية او انه يشكر ويمدح في منتج/خدمة وهو مجربهاش ولا استخدمها اصلا.
وكمثال بسيط لتوضيح الدافع ممكن يوصل لايه، فـ
– احد اشهر المواقع الاخبارية اللي بينشر اخبار متفبركة اكثر من الاخبار الصحيحة بيكسب “تقريبا” 50 الف دولار شهريا من الاعلانات اللي بتتعرض عليه.
– احد صانعي المحتوي او اللي بيقال عليهم Influncers لانه عنده متابعين كتييير – بغض النظر عن نوعية محتواه – بياخد 3 الاف دولار علشان يسجل فيديو لشركة او عن منتج/خدمة.
– احد صفحات الفيس بوك المشهورة بالتريقة علي حاجات كتير اتباعت بـ ٣ مليون جنيه لاحد الشركات من سنتين.

– ليه شتيمة عبيد الترافيك والتفاعل حرام؟
بما اننا وضحنا الهدف من اللي بيعملوه،
ففكرة انك تنشر محتواهم علشان تشتمهم/تتريق عليهم دا الهدف اللي بيضمن استمراريتهم…حتي لو هاتشتمهم في الكومنتات..دا يعتبر بالنسبة “مثلا” للفيس بوك “تفاعل” بيدل علي جودة المحتوي، وبالتالي هايظهره اكثر لاصحابك والناس اللي شبهك سواء انه هايظهرله انك اتفاعلت معاه او لانه بالنسبة للموقع بيعتبر دا تفاعل، وكل ما الناس تنشر وتشتم اكثر كل ما الـ Reach & Engagement بيزيد وكل ما الناس بتتفاعل اكثر كا ما هما بيكسبوا اكثر والناس تقلدهم اكثر و بكده هانفضل كده علي طول…
– ناس تعمل محتوي زي الزفت
– الناس تنشر محتواهم وتعلق عندهم وتتفاعل وتفضل تشتمهم وتعملهم angry emotions
– الموقع/الصفحة ياخدوا انتشار ويكسبوا اكثر
– فالناس تعّرف ناس علشان يدخلوا يشتموا هما كمان
– فالموقع والصفحة يحصل عليها تفاعل اكثر، فيزودا نسبة الـ debated content علشان الناس تشتم اكثر وينتشروا اكثر
وهكذا… infinity loop ملهاش اخر.

ممكن برضه تشوف الفيديو ده اللي بيتكلم علي فكرة الـ content farm
https://www.youtube.com/watch?v=gbXtUo0CFnY

– ايه اللي المفروض يحصل؟
لو شفت اي حاجة مش عجباك،
– اسهل وافضل حل هو التجاهل، هو دا شكله حل سلبي..بس لا، دا فعلا من افضل الحلول للموضوع لانك لما بتظهر قدامك حاجة و مبتتفاعلش مع حاجة “خاصة” علي الفيس بوك…الفيس بوك Technical بيتعامل معاها علي حسب الخوارزميات algorithms بتاعته انها محتوي مش جيد ليك، وبالتالي بيقلل نسبة وصوله للناس اللي شبهك او اللي بيتفاعلوا مع الحاجات اللي شبه اللي بتتفاعل معاه.
– Negative Feedback
اي حد بيدير صفحة علي الفيس بوك عارف ان في نوعية تفاعل اسمها “تفاعل سلبي” زي انك لما يظهر قدامك بوست مثلا تدوس علي الـ 3 نقط اللي موازين لاسم الصفحة وتدوس علي Hide post
كده انت بتبعت اشارات indicators للـ algorithms او الخوارزميات بتاعت الفيس بوك ان المحتوي ده مش كويس والفيس بوك هايقلل انتشاره
– Report Spam
ودا اقوي الحلول انك من نفس الـ 3 نقط اللي موازيين لاسم الصفحة تدوس report spam هتلاقي الفيس بوك بيقولك انت عايز تعمل report للبوست ده ليه؟ هل دا يعتبر
– Spam مزعج
– Hate Speech كلام غير لائق
– Nudity اباحي
– False news story خبر كاذب
موضوع الخبر الكاذب “False news story” دا لاننا زي ما وضحنا الفيس بوك مش بيحلل تعلقاتك علشان يفهم انك بتشتمهم وتقولهم يا كدابين، هو عامل حاجة تقدر تبلغه ان دا خبر كاذب، و لما الموضوع بيتم من اكثر من شخص في نفس الوقت البوست بيتشال وممكن الصفحة كلها تتقفل.

– هل انا لوحدي هاقدر اعمل كده؟
في الاغلب “طول حياتك” فكرة انك كشخص عادي تقدر تأثر علي شركة/كيان “خاصة” لو كان كبير ممكن تكون صعبة شويتين، بس علي الانترنت الموضوع فيه بعض الاختلافات، الامثلة هنا كتيير، بس احد الامثلة دي في 2015
لما قناة النهار علي اليوتوب كانت بتعرض برنامج ريهام سعيد وكان في الخلفية صورة لبنت، في الاغلب الشخص اللي عمل الديكور نزل الصورة من بحث جوجل…لكن الصورة كانت ملك لشخص اسمه كريم، قدر انه يعمل report وتم فعلا قفل قناة النهار علي اليوتوب بالكامل لانتهاك حقوق الملكية لكام يوم لحد ما تم الصلح مع كريم كمالك للصورة.
https://www.facebook.com/SBKits/posts/424771211016462

وبالمناسبة موضوع الـ Report بيتعمل برضه مع اي صفحة بتلاقيها من خلال محرك البحث من هنا:
https://www.google.com/webmasters/tools/spamreport?pli=1

فلو مش هاتقدر تشارك في انك توقف المحتوي السيء بالريبورت، فبلاش تتفاعل مع اي محتوي مش عاجبك لانك بتزود انتشاره وبتساعد في تكراره

Social Media Trainer/Social Business Strategist Helping you build your online identity through Social Media

التعليقات مغلقة.