#NuggsForCarter

فيه مطعم أكلات سريعة شهير جدًا في أمريكا إسمه Wendy’s، بيقدم وجبات مختلفة، بس واحدة من أشهر الحاجات اللي بيقدمها هي الـ Chicken Nuggets أو قطع الدجاج .. الحساب الرسمي بتاع المطعم ده على تويتر ماسكاه بنت أقل ما يقال عنها إنها مسخرة، كتلة من الكوميديا والقفشات والسف، بس مش هي موضوعنا حاليًا ..

من أسبوعين، ولد أمريكي عنده 16 سنة إسمه كارتر ويلكرسون، الأكاونت بتاعه عادي جدًا، يادوب 150 فولوور، ولا هو شهير ولا أي حاجة .. بعت تويت للحساب بتاع وينديز، قالهم “هو أنا محتاج يتعمل لي كام ريتويت عشان آخد منكم تشيكن ناجتس مجانًا لمدة سنة؟” .. البنت بما إنها سفافة وبتحب الضحك، ردت عليه بأي رقم اعتباطي كده، فقالتله 18 مليون ..

رقم تعجيزي فشخ، بس العجيب هو رد فعل كارتر .. قال لهم Consider it done .. بس، وأخد التويت دي، وإبتدى يقول للناس تعمل لها ريتويت، وبدأوا الناس يساعدوه ..

نام الولد، وصحي، ولقى عنده خير اللهم اجعله خير 15 ألف فولوور جداد، والتويتة بتاعته معمول لها ريتويت بعشرات الآلاف ..

الله؟ ده الموضوع جد بقى!

بدأ الموضوع ينتشر بسرعة عجيبة، والناس مستمرة في الريتويت .. 10 أيام على الحال ده، لحد ما وصل لرقم 2.6 مليون ريتويت ..

طيب، واحد وبيكتسح تويتر عشان يكسب .. عادي يعني، في إيه؟

لأ مش عادي ..

الرقم القياسي حتى الآن لأكتر تويتة في العالم معمول لها ريتويت، بتحتفظ بيه الإعلامية الشهيرة Ellen DeGeneres صاحبة برنامج The Ellen Show، والتويتة بتاعتها كانت عبارة عن صورة سيلفي لها بموبايلها مع مجموعة كبيرة من نجوم هوليوود، إتاخدت في حفل توزيع جوائز أوسكارز 2014، واللي أخد الصورة هو الممثل الأمريكي برادلي كوپر .. التويت بتاعتها دي لحد بداية وقت المنافسة كانت جايبة 3.2 مليون ريتويت ..

مع اللي بيحصل ده، حست بالخطر اللي بيقرب، القادمون من الخلف زي ما بيقولوا .. الواد في 10 أيام بس جاب 2.6 مليون ريتويت .. تعملي إيه يا إيلين، تعملي إيه يا إيلين .. مابدهاش .. طلعت في البرنامج بتاعها، وفي إطار كوميدي جدًا، قالت يا جماعة أنا محتاجة مساعدتكم، أنا عملت وسويت وتعبت وروحت وجيت، وفي الآخر قدرت أحقق الـ World record ده .. بعد كل ده ييجي ولد عايز شوية ناجتس يكسر رقمي القياسي؟ أنا متضايقة جدًا، وعايزاكوا لما تعملوله ريتويت تعملولي ريتويت معاه، عشان هو يكسب الناجتس بتاعته وأنا تخلوني أفضل دايمًا On top ومحتفظة بالصدارة .. وإنت يا كارتر، لو وصلنا للـ 18 مليون وأنا متقدمة عنك هأديلك هدايا كتير ومش عارف إيه ..

بعدها بيومين، طلعت تاني وجابت معاها برادلي كوپر، اللي أخد صورة الأوسكار بموبايلها .. يا جماعة إحنا محتاجين مساعدتكم عشان مانخسرش الـ title بتاعنا، إحنا تعبنا كتير .. برادلي قال أنا فضلت مادد دراعاتي قدامي 40 ثانية بحالهم عشان آخد السيلفي دي وعضلات الباي بتاعتي كانت بتترعش، وإيلين قالت أنا فضلت قاعدة على حِجر ميريل ستريپ وقت طويل وفي وضع مش مريح إطلاقًا عشان ناخد السيلفي دي .. إحنا تعبنا في الرقم ده ومش هنخسره ..

الموضوع ضحك فشخ، بس اللي بدأ يحصل بعدها مايضحكش ..

حساب Wendy’s – البنت المسخرة إياها – قال إنه لو ريتويتس كارتر وصلت لرقم معين، هيتبرعوا بـ 100 ألف دولار لمؤسسة Dave Thomas Foundation لرعاية الأيتام وإيجاد متبنين لهم .. كارتر عمل هاشتاج #NuggsForCarter، وبدأ هو والناس يتكلموا عليه عشان يجمعوا أرقام أكبر ..

تويتر نفسه، المنتفع الأعظم من كل اللي حصل، راح عامل ڤيديو بيحكي فيه حدوتة المنافسة وبيشجع الناس إنها تشارك بالريتويت .. و Twitter Marketing بقى يعمل دعاية للموضوع وإزاي الإقبال عليه مخلي الناس تتجنن أونلاين ..

حساب صحيفة USA Today الرسمي، واحدة من أكبر الصحف الأمريكية، عمل مشاركة – ودعاية ضمنية – في الهاشتاج ..

حساب Apple Music الرسمي راح داخل، “بنحييك يا كارتر”، وشاركوا بالهاشتاج وعملوا ريتويت ..

مايكروسوفت وراه .. “We’re In، إيه نظامكم يا Google ويا Amazon؟”، وشاركوا بالهاشتاج وعملوا ريتويت ..

جوجل نزلت، “حظك ماشي يا كارتر؟”، وشاركوا بالهاشتاج وعملوا ريتويت .. وراها أمازون، “إمشي ورا حلمك يا كارتر”، وشاركوا بالهاشتاج وعملوا ريتويت ..

وينديز، “بصراحة هو أخد ريتويتس أكتر بكتير أوي من اللي كنا عاملين حسابنا عليه” ..

مؤسسة Dave Thomas Foundation راحت داخلة، “إحنا متشكرين يا كارتر إنت وإيلين على توعية الناس بينا، وإحنا متابعين السباق ده باهتمام”، وشاركوا بالهاشتاج وعملوا ريتويت ..

إيلين ديچينرس استضافت كارتر نفسه في برنامجها .. ضحك وبتاع، وفي الآخر يا جماعة إعملولي أنا وهو ريتويت عشان أنا أفضل الأولى وهو يكسب .. وإديتله هدايا زي ما قالت، تليفزيون 55 بوصة بأوبشنز التنين المجنح وشوية حاجات تانية ..

شركة Oath التابعة لـ Verizon، واحدة من عمالقة الإتصالات في أمريكا، “وإحنا كمان هنتبرع بـ 100 ألف دولار لو كارتر عدَّى الرقم بتاع إيلين”، وشاركوا بالهاشتاج وعملوا ريتويت ..

حساب Universal Studios أخد صورة من التويتس اللي جاياله بتسأله “كام ريتويت وناخد تذاكر مجانية؟”، وبعتها لحساب Wendy’s وقالهم “دي غلطتكوا، شايفين فتحتوا علينا إيه؟” ..

حساب Sanya Tourism دخل، “لو كسرت الـ 18 مليون يا كارتر، حتى لو خسرت، هنديلك رحلات طيران عشان تاكل ناجتس في الحتة اللي إنت عايزها” ..

الـ CEO بتاع T-Mobile USA لخطوط الموبايل، John Legere، دخل قاله “أنا آسف إن إنت معاك خط AT&T (المنافس الأكبر لـ T-Mobile)، تعالى عندنا وأنا بنفسي هأجيبلك تشيكين ناجتس من وينديز لمدة سنة ببلاش وحاجات تانية أكتر” ..

حساب السوشيال ميديا بتاع البيزنس LinkedIn، قاموا عملوله ريتويت وإحنا معاك وبتاع ..

برايان ساندوڤال، حاكم ولاية نيڤادا الأمريكية، راح داخل هو كمان بحسابه الرسمي، “أنا معاك يا كارتر، إيه نظامكم يا جماعة؟”، وقام عامل مينشن لحكام ولايات أوهايو وكولورادو ونيويورك وڤيرجينيا وكاليفورنيا ورابطة الحكام الجمهوريين وعالم تانية كده ..

غير طن الموسيقيين والمغنيين والمنتجين والرياضيين والأندية و brands الملابس اللي عملوله دعم وريتويت وشاركوا في الهاشتاج ..

النهارده بعد أسبوعين، إيلين سابقة بـ 3.4 مليون (فرق 200 ألف بس عن وقت ما المنافسة بدأت)، وكارتر وراها بـ 3.2 مليون (اللي بدأ من أسبوعين بـ 150 فولوور ووصل دلوقتي لـ 83 ألف، وبدأ من أسبوعين بصفر ريتويت وكسر التلاتة مليون، وجاب رقم الريتويتس ده في زمن قياسي جدًا يقول إن الموازين ممكن تتغير)، والمنافسة مستمرة ..

الموضوع بقى عامل زي كرة الثلج، بيكبر بطريقة مخيفة .. مواقع تكتب، وكالات أنباء تنقل، والواد نفسه بدأ يعمل تيشيرتات وكابات وحظاظات عليها الهاشتاج بتاعه .. في أقل من أسبوع بقى تريند ..

السوشيال ميديا مجنونة .. ممكن تعمل دعاية ببلاش، وممكن تخلي واحد عادي يبقى ملك متوج بين ليلة وضحاها، وممكن تخسف بشركة الأرض زي ما عملت في طيران United كده ..

بالمناسبة .. في بوست انتشر على الفايسبوك من يومين تلاتة، عن شاب سعودي بعت لمطعم عندهم إسمه شاورمر، بيقولهم تعملوا كام ريتويت وآخد منكم 100 وجبة مجانية لعمال النظافة، وبعض الشركات السعودية شاركت معاه في الموضوع زي القصة دي كده .. بحسبة بسيطة لتواريخ التويتس بتاعة الإتنين، كارتر من أسبوعين وعبدالعزيز من 5 أيام، أعتقد والله أعلم، إننا نقدر نقول وإحنا متطمنين إن قصة كارتر هي الأصل، وإن عبدالعزيز جايز يكون حب يكرر الموضوع عنده لكن بشكل مختلف ..

فيه مطعم أكلات سريعة شهير جدًا في أمريكا إسمه Wendy's، بيقدم وجبات مختلفة، بس واحدة من أشهر الحاجات اللي بيقدمها هي الـ…

Posted by Yahia El-Fishawy on Wednesday, April 19, 2017

https://thinkmarketingmagazine.com/this-one-tweet-brings-back-hope-for-humanity-in-business/

 

Comments

Social Media Trainer/Social Business Strategist Helping you build your online identity through Social Media

التعليقات مغلقة.