لماذا فشلت حملة بيبسي في رمضان 2015

لماذا فشلت حملت بيبسي في رمضان 2015 علي الرغم من وجود المشهد الاكثر تأثيراً من كل اعلانات رمضان حتي الان.

خلينا نتفق في الاول علي نقطتين:

1- كل ما يقال من تحليلات لكل الحملات اللي بتحصل مجرد وجهة نظر لصاحبها مبني علي شوية عوامل قد تختلف من شخص للتاني.

2- علشان نقول ان الحملة نجحت او فشلت بيبقي لازم نعرف الاول الهدف من الحملة كان ايه ..لان مش كل الحملات بيبقي هدفها التفاعل بس فلما تبقي عارف هدف الحملة كان ايه والحملة “اي حملة” حققت اد ايه من الهدف تقدر تقول الحملة ناجحة او فاشلة

فبناء علي النقطتين دول: اللي جاي دا وجهة نظري للحملة بناء علي التفاعل اللي حصل بمجرد ظهور الـ Teaser او الاعلان التشويقي للحملة ومقارنة برد فعل الناس علي الـ Social Media مع حملة بيبسي رمضان 2014 

حملة بيبسي “او المفروض نقول بيبسي وشيبسي” يلا_نكمل_لمتنا ابتدت في 2013

من اهم اسباب نجاح الاعلان :
1- الاعلان ابتدا بموقف “اغلبنا” بيمر بيه حاليا.. وهو انك بتبقي قاعد مع عيلتك واصدقائك يكلموك ..
2- فكرة النوستاليجا – كانت جديدة في الاستخدام في الاعلانات – بالنسبة لاغلب الناس
3- اغلب الشخصيات اللي استخدمت (“بوجي و طمطم” – “شخصية فطوطة” – فؤاد المهندس- نيلي”) كلهم كانوا بيتكلموا ..مما ادي الي الاحساس بروح في الشخصيات ..ودا اثر في ناس ناس كتيير .. انه سمعهم مش بس شافهم

الـ 3 اسباب مكنش ليهم اي استخدام في الاعلان في نسخة 2015 .. لا موقف بنعيشه ..والنوستاليجا بقت فكرة قديمة .. والشخصيات مجرد صور بس .

اما في نسخة 2014 من حملة يلا نكمل لمتنا

تفاعل معاها عدد كبير جدا علي الرغم من تكرار فكرة النوستاليجا.. للاسباب التالية:

1- الاغنية اللي استخدمت كان بين ثنائي “هشام عباس وحميد الشاعري” ليهم ذكريات مع الناس ..سواء كل واحد لوحده باغانيه زمان .. او حتي اغانيهم زمان مع بعض زي اغنية عيني
2- كلمات الاغنية كانت معبرة جدا عن الواقع اللي اغلبنا اصبح فيه زي:
“فاكر ايام لمتنا كانت تعدى ساعات فى ثوانى بتجمع احلى الناس مش اي لمة وخلاص” –
” فرقتنا الايام اللى اتجوز واللى اعدت بالعيال اللى سكن بعيد واللى تحجج بالمواعيد واحلى لمة بقت ذكرى”

دا غير ان فيها استخدام Call To Action  مباشر زي
“يلا نرجعها تانى ونجيب كل اللى واحشنا يلا ارفع التيلفون ونلم الشمل يوم رجع لمتنا”

والاجمل ان كلمات الاغنية اديتك الـ benefits اللي هتاخدها لما تعمل كده – حتي من قبل ما تعمله 🙂
“ايوا كدا رجعنا ولا حاجة فاتتنا الضحك بتاع زمان دة طعم رمضان يحلى بلمتنا بدوشة الاولاد والفرجة على المسلسلات اصناف اشكال والوان فى الاكل والناس كمان باللمة تكمل”

3- مواقف الاعلان كانت ذكريات جميلة
” عزت ابو عوف واخواته : موقف مكنش اغلب الناس تعرفه ودخلوا بحثوا عنه”
” حميد الشاعري وهشام عباس وذكريات اغانيهم زمان”
“قلة حبنا: سمير غانم شيرين .. من اكتر مشاهد الكوميديا في مسرحية المتزوجون”
“ماما نجوي وبقلظ” اللي مفيش حد من أطفال جيل الثمانينات وأوائل التسعينات متفرجش عليها
“منتخب مصر وكاس العالم 1990 .. والجميل انه جابوا الكويس بس ومفصلوش الناس بمجدي عبد الغني.
“لقطة ظهور جورج سيدهم كانت من اقوي اللقطات ..نظرا لاختفاءه فترة طويلة لظروف مرضه”

4- اخر الاعلان كان عبارة عن فكرة رائعة وهي توضيح لاهم و “ابسط مثال” اللي الناس كلها ممكن تعمله .. وهو انك تجيب صور قديمة ليك مع حد من عيلتك او قرايبك او اصحابك .. وتتصور وصورة دلوقتي بنفس الوضع اللي كنتوا عليه زمان.. ودا كان اكتر حاجة الناس عملتها علي الفيس بوك وعلي انستجرام 🙂

واخيرا ” او حتي الان” نسخة 2015 من الاعلان كان بعنوان هنكمل لمتنا وللاسف مفيش حاجات من اللي فات اتطورت او اتعملت بشكل جديد في نسخة 2015 باستثناء كلمات الاغنية

1- كلمات الاغنية فعلا كانت بتوصل وتكمل الفكرة.. زي
“جه الدور عليكوا،، تكملوا أيامكوا بإيديكوا ماتعيشوش فى اللى فات،، واخلقوا ذكريات تكون لايقة عليكوا”
” حضن حد بتحبه مبتتعوضش بصوره قلب بعته ولا ضحكه في التلفون 😀 زي ما تشوفها العيون … مع بعض حاجه تانيه”
بس اختيار حسين الجاسمي في الاغنية كان ملوش اي معني علي الاطلاق.
2- بداية الاعلان والشخص اللي ماش باصص علي اتليفون ومركز معاه كانت حلوة لانها تعبير عن الواقع بس تعتبر تكرار لاعلان 2014
3-محاولة ريط الاحداث وتكلمتها كانت لطيفة زي موضوع ثلاثي اضواء المسرح و الثلاثي الحالي
“ما يعرفوا بـ ” سمير وشهير وبهير .. لكن ظهور محمد هنيدي مكنش ليه برضه اي معني
لقطة الكورة وتعليق جورج سيدهم كانت حلوة بس كان ينقصها “صوته” .. لقطة الزينة مع فؤاد المهندس وعبدالمنعم مدبولي كانت حلوة خاصة في ربطها مع الثلاثي “احمد فهمي وشيكو وهشام ماجد”
4- لقطة الامارات ملهاش 30 اي معني “غير فكرة بفلوسهم” ودي كانت من اسوء ما يكون.
5- فكرة الاعلان ككل وخاصة اللقطات اللي ظهر فيها ” احمد مظهر وصباح” ولقطة “بوجي وطمطم ويونس شلبي” كانت زحمة جدا .. ودا بين لناس كتيير ان فكرة الاغنية مسروقة من الاغنية دي

لانها معتمدة علي نفس الـ Concept

6- علي الرغم من ان التقنية نفسها ممكن يتعمل منها حاجات كتير تخدم الفكرة اكتر زي ما بيبسي عملت في لقطة تعليق جورج سيدهم علي لعب الكورة .. وز ما قناة روسيا اليوم بتستخدم في نشراتها الاخبارية هده التقنية

7- افضل لقطة في الاعلان كله كانت لقطة ظهور “احمد زكي” مع ابنه
ودا حصل عليها تقريبا اغلب التفاعل ودا ظهر من خلال تفاعل الناس .. مقارنة بتفاعل الناس مع الاعلان نفسه

Screen Shot 2015-06-29 at 5.17.59 PM

Screen Shot 2015-06-29 at 5.18.11 PM

 

لكن علي عكس لقطة فؤاد المهندس في اعلان 2013 ولقطة جورج سيدهم في اعلان 2014 اللي كانوا ايجابين مع اغلب الناس .. كانت لقطة ظهور احمد زكي مع ابنه ..سبب وجع لناس كتير مفتقدة والدها “ربنا يرحمهم جميعا” ودي ادي الي نفورهم عن الاعلان ككل.

8- ضيف الي ذلك تأخر بيبسي في ظهور الاعلان ” وكوكاكولا كذلك” مع ظهور الكثير من الاعلانات المسروقة واللي ملهاش اي معني ادي الي تشوّق بعض الناس “بذيادة” اثناء انتظارهم الاعلان .. وبمجرد ظهور الاعلان حصل عليه تفاعل “مع شوية ظيطة” وكلام كتيير ملوش معني ..خلي الناس تتفاعل بشكل عكسي واكتر من حد كتب ان الاعلان مش مستاهل كل الدوشة اللي عليه دلوقتي.

اخيرا:  بيبسي في الحملة دي – نسخة 2015 – معمولة بالتعاون مع مصر الخير.. والحملة لسه فيها تفاصيل تانية محمد عمر اتكلم عنها في البوست دا

ديه بقية الحملة اللي كنت بقولكوا عليها من كام يوم “خطوط نور تجمعنا كلنا”، المقصود بخطوط النور هنا مشروع داحلة فيه بيبسي …

Posted by Muhammad Omar on Sunday, June 28, 2015

فنرجع ونأكد تاني ان الموضوع تحليل من وجهة نظر شخصية بناء علي عدة عوامل تم ذكرها 🙂

 

 

Social Media Trainer/Social Business Strategist Helping you build your online identity through Social Media

التعليقات مغلقة.