معادلة الأداء

كنت درست في “الإدارة العامة” وقت الكلية معادلة اسمها “معادلة الأداء”
(الأداء = الرغبة X القُدرة)
performance = Motivation (desire) x Ability (capability)

من ساعة ما عرفت القانون ده وأنا عندي سؤال فلسفي ناحيته. من وقت للتاني أسأل: هو ليه “أداء الفعل” معتمد عل حاصل ضربهم، ومش ناتج جمعُهم؟
(ما هي هي، لو جمعنا “رغبتنا” في القيام بعمل جنب “قدرتنا” = هنقدر ننفذ العمل!)

بغض النظر عن إني ليه ساعتها ما سألتش الدكتور السؤال ده…

مرت السنين وإذ بالحياة بأحداثها تعلّمني الرياضيات من زاوية أخرى، لأنها عارفة إني ما بحبش الحساب ولا الأرقام، لكن بأحب أفهم العلاقات بين الأرقام والواقع…فتكشف لي إن “الجمع” علاقة مختلفة تمامًا عن “الضرب”

* “الجمع” علاقة إضافة، مش أكتر
* إنما “الضرب” علاقة مُضاعَفة

يعني في الجمع، لو الرغبة بـ 3 والقُدرة بـ 5… كل بند منهم داخل بقيمة بتزوّد اللي جنبه اه، لكن زيادة عددية
إنما في الضرب، قيمة الـ 3 بتدخل على الـ 5 تضاعف من قيمتها بتكرارها
ونفس التأثير بتعمله الخمسة في التلاتة.. فيطلع “الأداء” ساعتها أضعاف مجموع قيمتهم هم الاتنين مع بعض!

والأخطر.. إن فيه حالة الجمع… لو الرغبة بـ ((صفر))، القدرة هتفضل محافظه على قيمتها بـ 3 وساعتها هيبقى “أدائك” قيمته 3
لكن في الضرب (وفي الواقع الفعلي)، الاتنين بيتأثروا بعض، لدرجة إن “الرغبة” لو كانت بـ (صفر)، هيُفـقِـد “القُدرة” قيمتها (حتى لو كانت فعليًا موجودة!)

فمش معنى إن عندك قدرة على فعل شيء، إنك هتأديه، بدون “رغبة”!

لكن في نفس الوقت، تقدر تزوّد الرغبة بالقُدرة أو القُدرة بالرغبة 

المعادلة دي ممكن تستخدمها في أي حاجة.. وأنت بتتعلم أو عاوز تتعلم حاجة جديدة، وأنت بتشتغل، وأنت بتغسل المواعين 

فيه مشهد في أواخر مسلسل “لن أعيش في جلباب أبي” لما الأب كان بيحاول يقنع ابنه (بعد ما الدنيا خبّطت فيه وخسّرته) ييجي يشتغل معاه ويشيل تجارة “عبد الغفور البُرعي” في سوق الخُردة.

لما الإبن بيقول له: أنا مش ممكن أقدر أعمل اللي أنت عملته!

فالأب -بحكمة تاجر قديم في السوق، كان بيحقق المعادلة دي وعدّى بيها من كم صعوبات، بيقول له:
“شوف يابني.. الدنيا ما بتديش غير للي يقدر ياخد، وعاااوز ياخد..
وأنا متأكد إنك تقدر..
بس ناقص تورّي الدنيا إنك “عايز”!