عن Power of Social Media …وعكسه

في 2013 كنت واحد من ضمن مجموعة اشخاص بتحب الـ Social Media وشايفنها حاجة كبيرة او – علي الاقل – هاتبقي حاجة كبيرة وبنتكلم عن كده،في نفس التوقيت اللي فيه ناس وشركات كبيرة مش مؤمنة بالموضوع ده من اساسه،
احنا هنا مش مختلفين علي حجم قوتها..احنا في توقيت بنتكلم هل هي قوية اصلا وتستاهل “تجربها” وقتها او لا.

في خلال 2014 & 2015 كان فيه مجموعة كبيرة “نظريا” مقارنة بالفترة اللي قبلها ابتدت تتكلم عن the #Power_of_SocialMedia
وهنا – عرفت بعد فتره انها مفهوم الـ Perspective – وبان فيها الاختلافات:
١- ناس كتيير بتقرأ ليل نهار عن Case Studies كتييير عن قوة وتأثير الـ Social Media في كل المجالات، فبتتكلم عنها.
٢- ناس كتيير برضه لسه مش مؤمنة بالموضوع وبحكم شغلهم في التسويق..شايفين ان دا لعب عيال وان الموضوع مجرد فقاعة وهاتختفي بعد فترة ومش مهتمين يقروا عنها ولا يسمعوا اصلا ورافضين الكلام ككل في المطلق.
٣- ناس كانوا من ضمن الناس رقم “٢”، بس شافوا ان في فعلا في Cases وابتدوا يدوروا في الموضوع ده.

الناس رقم “2 و 3” وجزء من رقم “1” هما اللي حاليا “في 2018” بيتكلموا ان التسويق مش دعايا واعلانات بس وان في حاجات تانية مهمة، وان الـ Digital ما هو الا اداة من ادوات التسويق وان فكرة اننا نقول التسويق دا اونلاين ولا اوفلاين غلط لاننا بنتكلم في الحالتين عن الـ Promotion وانك لازم تهتم بجميع عوامل التسويق من Market Research للـ STP واخيرا الـ Market Mix وعلي الرغم من ان دا صح جدا لكنه – في الاغلب – محدش بيسمعه، ليه؟
بعيدا عن السبب الاهبل اللي بيقول ان الناس بتوع الـ Digital بشكل عام ربطوا كلمة التسويق بالـ Digital، لكن الحقيقة الربط ده بالتحديد فعلا موجود من قديم الازل، مفيش حد كان بيتكلم عن نقطة التفريق بين مصطلح التسويق والاعلانات “الا نادرا”، كل الناس كانت بتتكلم عن الاعلانات وتأثيرها …
– رايحة فين يا فاطمة، رايحة اجيب اومو، جاية منين يا فاطمة كنت بجيب اومو
-عايز نوكيا روح لراية، عايز نوكيا روح لراية، عايز نوكيا روح لراية،عايز نوكيا روح لراية،عايز نوكيا روح لراية
– اعلان حلاوة عرفه الجامع والواد كان عنده، اوعي تقوليله لا.
– اعلان كيتو ناموس عمال يقرص ياخويا مش عارف انام منه ياخويا، مش عارف انام
– دي غير اعلانات: هاتلنا ريري، عبدالرحيم عمرو، شيكولاتة كوفرتينا، حمدي بتشان واعلان سافو
و بعيدا عن ان احد اهم اسباب نجاح الاعلانات دي كان في الـ Frequency او معدل التكرار،
في ظل عدم وجود بدائل ليهم – هانتكلم عن النقطة دي تحديدا بالتفصيل في بوست اعلانات رمضان 2018 – بس الشاهد في الموضوع ان نجاح اي حاجة كان بيعتمد علي الاعلانات، وان اغلب قدامي المسوقين مفتكروش ان التسويق مش مجرد داعايا غير لما البساط اتسحب منهم ومبقاش حد بيسمع لهم “خالص تقريبا”، فاشتغلوا بنغمة الـ Social والـ Digital مش التسويق وانهم مجرد “احد” وسائل الدعايا.

فـ في النهاية، وفي خلال الفترة اللي فاتت ناس كتيير اتكلمت عن the #Power_of_SocialMedia تحديدا من وجهتين نظر:
الاولي انهم اتكلموا عنها من منطلق انها بتحقق عائد علي الاستثمار  Return On Investment “ROI” اعلي من اي وسيلة دعايا تانية، بمعني انك لو صرفت مثلا X من المال علي الـ Social Media او الـ Digital وصرفت نفس الـ X من المال علي اي قناة تانية، فالوسائل الـ Digital هاتحققلك عائد اكبر من اي وسيلة تانية في علي الاقل 90% من اغلب الحالات.

وجهة النظر التانية وهي التغير الفعلي “علي الارض” في حاجات وحالات كتييرة جدا تم تحقيقه من خلال الـ Social Media،
منها علي سبيل المثال لا الحصر:
– في 2008 شركة United Airlines كسرت جيتار المغني الكندي Dave Carroll اثناء شحن جيتاره في احد الراحلات،
Dave عمل اغنية اسمها United Breaks Guitars وعلي الرغم من ان الـ Social Media لم تكن بمثل قوتها في هذه الايام، الا ان الاغنية انتشرت جدا واصبحت Viral وحققت 150,000 مشاهدة في اول يوم، دا غير انها اصحبت الاغنية الاولي علي الـ  iTunes Music Store  بعد اسبوع، و بسبب انتشار الاغنية، في ناس قررت انها تقاطع خطوط طيران الشركة ودا ادي الي خسارة الشركة لـ 10% من اسمها او ما يوازي 180 مليون دولار، فنقدر نقول ان the #Power_of_SocialMedia هنا انه عرّف ناس كتييير كانت مش هاتعرف بالموضوع من غير انتشار الموضوع علي الـ Social Media ولما الناس اللي عرفت قاطعت الشركة بان تأثير الـ Social Media.

– في 2017، نفس الشركة United Airlines كانت علي موعد اخر من الـ Viral Videos ولكن هذه المرة ليس لجيتار، ولكن لسحب رجل من علي الطائرة بالقوة. احداث هذه الواقعة تتلخص في ان في احد رحلات United Airlines والتي كانت محجوزة بالكامل Overbooked بعد صعود الركاب الي الطائرة، قررت شركة الطيران سفر 4 من موظفيها علي هذه الطائرة للسفر لمطار تاني للقيام برحلة من هناك،
فطلبت من الركاب بشكل عام ان يقوم 4 منهم بالتطوع وترك الطائرة وفي المقابل ستقوم الشركة بدفع تعويض 800 دولار وتوفير غرفة لهم لحين معاد الطائرة التالية “بعد يوم”. لكن لم يقم احد بالتطوع فكان علي الشركة اختيار 4 اشخاص وابلاغهم انهم يجب ان يغادروا الطائرة، الاختيار تم بناء علي مجموعة عوامل يستثني منها المسافرون الدائمون,
من ضمن الاشخاص اللي تم اختيارهم لمغادرة الطائرة كان Dr. David Dao الدكتور الصيني صاحب الـ 69 عام، لكنه رفض المغادرة، فقام 3 اشخاص من الـ Aviation security officers بسحبه بالقوة مما ادي الي اصابة دكتور ديفيد اثناء مقاومته لهم بكسر في الانف و فقد 2 من اسنانه واصابته بارتجاج ووظهور دم علي وجهه، الفيديو او الفيديوهات اللي تم تصوريها من اكثر من راكب من ركاب الطائرة انتشرت انتشار كبير جدا جدا علي الانترنت خاصة في الصين – بلد الدكتور ديفيد – واللي اصبح الفيديو فيه رقم 1 في الـ Trending علي موقع Weibo واللي يعتبر تويتر الصيني مع دعوات من ناس كتير بمقاطعة الشركة.
طيب والـ #Power_of_SocialMedia اثر ازاي في الحالة دي….لاشيء …ايوه…لاشيء

يعني شركة طيران كسرت جيتار اثناء الشحن لمغني، عمل اغنية في 2008 في ظل بداية الـ Social Media
والموضوع انتشر بين الناس “اللي عددهم مش كتير وقتها” والشركة تخسر 10% من اسمها او ما يوازي 180 مليون دولار واللي يعتبر رقم كبير جدا وقتها، ولما دكتور صيني يتبهدل ويتكسر من نفس شركة الطيران في 2017 في عز مجد الـ Social Media ميحصلش اي حاجة، طب ازاي!!!

الموضوع ببساطة هو في الحالة الاولي شخص تعرض لظلم والـ Social Media ساعدته انه يوصل رسالته للناس بطريقة محببة بالنسبالهم والراجل كان عنده حق فانتشر الموضوع، ولما الموضوع انتشر و الناس عملت ACTION الفعلي و المناسب بالمقاطعة الشركة خسرت.
اما في الحالة التانية، فنظريا شركة الطيران عندها حق – فبحسب الاحصائيات – انه من اصل 86 مليون شخص ركبوا خطوط الـ United Airlines في 2016، في 62,895 شخص تطوعوا انهم يسيبوا مكانهم في الطائرة وفي 3,765 شخص اجبروا يسيبوا مكانهم في حالات مشابهة، ودا بيحصل مع كل شركات الطيران في العالم ويعتبر دا من ضمن سياسات شركات الطيران، اه الحالة دي مختلفة لان الراجل تعرض لكسور، ولكن – وعلي الرغم من انتشار الفيديو – الناس مأخدتش اي ACTION فمحصلش حاجة.

ولو هاتقول ان دي امثلة اجنبية، هاقولك علي امثلة مصرية.

في 2010 شركة فودافون مصر كانت بتعمل حملة لباقات الـ USB الخاصة بالانترنت، الاعلان “الكوميدي” كان بيتريق علي عباس ابن فرناس،
الاعلان ضايق ناس كتييير جدا وقتها وقالوا ان ميصحش فودافون تتريق علي احد العلماء العرب،
وعلي الرغم من ان عدد مستخدمي الـ Social Media كان قليل في التوقيت ده،وعدد المتفاعلين باستمرار Active User خاصة علي تويتر كان اقل جدا  – لان اعداد المستخدمين في مصر تضاعفت علي الفيس بوك بعد اشاعة تعالي نشوف ايه الفيس بوك اللي عمل الثورة – الا ان المستخدمين عملوا هاشتاج #vodafly علي تويتر – لان مكنش فيه هاشتاج وقتها علي الفيس بوك – وابتدوا يكتبوا عليه تعليقات علي الفيديو علي اليوتوب و تويتات علي تويتر مضادة بتطالب فودافون بحذف الاعلان من التلفزيون ومواقع التواصل الاجتماعي،
طبعا فودافون وقتها – كرد فعل لاغلب الشركات – مسحت الفيديو من اليوتوب – فكل التعليقات اتمسحت – ورجعت رفعت الفيديو مرة تانية عادي جدا ولا كأن اي حاجة حصلت وعملوا Ban لمجموعة اشخاص وطفوا الولعة…او افتكروا انهم طفوا الولعة  🙂

مجرد ظهور الاعلان خلي ناس كتيير “تعلن الحرب” علي فودافون


دا غير ان في شخص اسمه مصطفي مراد – شخص واحد قرر ياخد Action فعلا – مصطفي صور فيديو قدام مقر فودافون وحكي تفاصيل الاحداث وقال انه هايعمل Deactivate للـ USB اللي بيستخدمها من فودافون وان لو فودافون في خلال اسبوع ممستحش الاعلان هايحول خطه بنفس الرقم من فودافون لاي شبكة تانية

وناس كتييييير قررت تعمل نفس اللي مصطفي عمله وابتدوا يكتبوا ده

 

دا غير الناس اللي قررت انها هتفضل تهاجم فودافون بعد الموقف المستفز اللي عملوه – بمسح الفيديو ورفعه تاني – بدل ما يعتذروا, وفعلا الموضوع سمع جدا وفي اكثر من موقع عالمي وقناة قاموا بتغطية الاحداث، زي مثلا
– دا لينك لمقالة عن الموضوع علي موقع The Next Web  ودي Print-screen من نسخة متأرشفة من موقع الياهو

وكان في مقالة علي موقع France 24 لكن للاسف اصبحت غير متوفرة
http://www.france24.com/en/20101117-vodafone-drops-muslim-scientist-ad-after-complaints
لكن دا فيديو بيتكلم عن الموضوع – ملاحظة صغيرة: اخر الفيديو ده هتلاقي كان في حد في نفس توقيت الهجوم علي فودافون بيقول ان الحملة والهجوم ده “جزء من خطة فودافون” لاشهار الموضوع اكثر 🥁🥁🥁🥁

طبعا بعد الضجة الكبيرة دي فودافون اضطرت تعتذر بشكل رسمي علي موقعها وعلي صفتحها علي الفيس بوك وتمسح الفيديو من كل المواقع الافتراضية وتوقف الحملة الاعلانية من علي التليفزيون كمان

ودا اللي خلي مصطفي اللي كان عامل الفيديو الاول يعمل فديو تاني ويشكر فيه فودافون علي استجابة المطالب و وضح كلمتين مهمين جدا عن the #Power_of_SocialMedia

تمام…حلو كده … case study زي الفل وحققنا هدفنا وعدنا لقواعدنا سالمة واتأكدنا من قوة الـ Social Media

قارن ده بقي بشركة فودافون بس في 2018 واعلانها مع ابلة فاهيتا

الاعلان اللي واجه موجة غضب من ناس كتيير وقالوا ان في ايحائات لا يجب ان تعرض، و صوتنا اتسمع وتم تشكيل لجنة بطلب من اللواء عاطف يعقوب رئيس جهاز حماية المستهلك و اعلنوا وقف الاعلان 

فرحة عارمة وعملنا حركة طيارة ابو تريكة وجرينا في كل مكان و زغاريط زغاريط زغاريط…وفجأة….هوب دبل كيك
فودافون نزلت البوست ده

ايه ده يا جدعان، في ايه … لا ابدا الموضوع طلع ان فودافون هي اللي قررت توقف الاعلان من التليفزيون وهاتشغله في كل مكان علي الانترنت عادي جدا جدا

يعني ايه؟ طيب ايه الفرق بين الموضوع الاولي والثاني؟؟!!

الفرق هنا في تعريف الـ Power الخاص بالـ Social Media لانها اوقات بتبقي فعلا اداة قوية في يد المستخدمين وبيقدروا يرغموا بيها شركات/كيانات عملاقة انها تنفذ مطالبهم، واحيانا اخري بتستغلها الشركات ضد المستخدمين في انها تجيب فيهم جول، وبعدها تاخد الكورة منهم وتجيب فيهم جول كمان… عايز مثال تاني

برنامج صبايا الخير لريهام سعيد، برنامج زي اي برنامج كان معدل مشهادة الحلقات والتفاعل عليها “عادي” مقارنة باي برنامج، الي ان حدث حلقة في 2014 خلقت جدل كبيييير جدا وهي حلقة ” البنت اللى نزلت تحت الأرض” واللي عملت ضجة كبيرة علي الـ Social Media


ماشي حلقة عملت جدل وفرقعت شوية وتمام.
في 2015 كان في احداث كثييير مع ريهام سعيد،
بداية من شهر مايو 2015 بمسح قناة النهار كلها من علي اليوتوب بسبب استخدام برنامج ريهام سعيد لصورة – لا تمتلك حقوق نشرها – في خلفية برنامجها، فبمجرد قيام صاحب الصورة بابلاغ اليوتوب، تم اغلاق قناة النهار بالكامل…قبل ان تتوصل قناة النهار لتسوية مع صاحب الصورة وتعود القناة ..مرورا باحداث عادية “مجرد تبين حب الناس لريهام” في سبتمير 2015, قبل الحدث الاهم في اكتوبر 2015

الكلام من موقع اعلانجي 
أثارت الحلقة الأخيرة لبرنامج الإعلامية ريهام سعيد غضب عارم على مواقع التواصل الإجتماعي بعد ما نشرت صور خاصة لواحدة من فتيات ضحايا التحرش ،  والتشهير بها مما اعتبره المشاهدون تصرف غير مهني وغير أخلاقي بالمرة، كل ده كان طبيعي جداً وبيحصل بعد كل حلقة، خاصةً إن الإعلامية مشهورة بمواضيعها المليئة بالسقطات الأخلاقية والمهنية، تقدر تتفرج بالفيديو مثلاً على أبرز سقطات ريهام سعيد من هنا
لكن الجديد المرة ديه، إن بدل ما يتعمل هاشتاج يتم فيه مهاجمة الإعلامية بشكل شخصي ، وبالتالي يكون رد الفعل مزيد من الإنكار أو التجاهل أو الجدال، بدأ الغضب ياخد منحى تاني لما مجموعة قرروا يتوّجهوا إلى تكنيك ضغط جديد: وهو عمل “إيفينت على فيسبوك: حملة لمقاطعة الشركات الراعية لبرنامج صبايا الخير” كوسيلة للضغط على الشركات المعلنة وبالتالي الضغط على القناة لوقف البرنامج.الصفحة جمّعت أكتر من 10 آلاف شخص، وسجل حضور للإيفنت 1500 شخص

وفعلا واستجابة للجماهير العريضة، في تقريبا 14 شركة من المعلنين والرعاة لبرنامج ريهام سعيد اعلنوا تضامنهم مع الجماهير الغفيرة و وقف رعايتهم واعلانتهم للبرنامج ولكثرة مشاكل ريهام سعيد

حلوة جدا ..سقفنا كلنا …اخدنا اللقطة…الاستاذ اللي ورا سقف…سقفتي يا مدام، شكرا جدا يا جماعة علي تفاعلكوا معانا الفترة اللي فاتت، كل واحد يرجع يقعد مكانه بقي لو سمحت
ريهام سعيد تعود بعد شهرين لبرنامجها الذي يهدف- علي حسب ذكرهم – لأداء دوره الخيرى والإنساني والوطني،
ايه ده ايه ده …هو كلام عيال..احنا اتضحك علينا،
يلا بينا نعمل هاشتاج “حذف قنوات النهار من الريسيفر” ونخليه ترند… تم يا معلمين .. وبعدين.. كام واحد اخد الـ Action المناسب وحذف فعلا القناة…ايه يا رجالة، الـ Social Media عملت اللي عليها وطلعت الهاشتاج ترند والناس كلها عرفت..مش يلا..مفيش حد..طيب تمام.
نستني بقي كده علي البرنامج كام سنة لحد ما تحصل فضيحة كمان و تنزل عدالة السماء علي ستاد بالريمو ويتوقف البرنامج 

في Cases كتير بتحصل، الـ #Power_of_SocialMedia الحقيقي، بيظهر لما يبقي فيه فعلا غلط “غير مألوف”، الغلط ده ممكن يتكتم عليه ومحدش يعرف حاجة، ولكن الـ Social Media هتساعدك توصل لاشخاص كتيير، تجمع ناس بتعاني من نفس المشكلة او بتقف مع اي حد صاحب مبدأ ولو الاشخاص اتفاعلوا التفاعل المناسب،
هايبقي هنا فعلا في قوة وحدث اتحققوا بفضل الـ Social Media.
لكن الغلط لو مألوف بالنسبه للمجال، او لو الناس مأخدتش ACTION او اخدت ACTION غلط، فالـ Social Media مش هاتفيد بحاجة.

الكلام ده بمناسبة موقف موقف سيرجو راموس ضد محمد صلاح – مع كامل حبي وعشقي لصلاح – بس الكلب سيرجيو راموس شخصية وسخة من زمان…من زمان قوي…من ساعة ما لعب كورة وهي دي طريقته الوسخة اللي عملها مع كل اللاعبين تقريبا

ولو الفيديو ده اتنشر 27/5/2018 تعقيبا علي حادثة راموس مع صلاح، فالفيديو ده موجود من 18/5/2018 قبل حادثة محمد صلاح وفيه كل الكروت الحمراء اللي اخدها راموس… والفيديو ده موجود من 25/10/2013  قبل ما راموس يبقي كابتن ريال مدريد و وقت ما كان محمد صلاح بيلعب في بازل السويسري ومحدش “الا نادرا” يسمع عنه
والحركة بتاعت صلاح بالتحديد هو عملها قبل كده “طبق الاصل” مع داني الفيش قبل كده، بس كمل فيها اكثر ابن الجزمة مع صلاح

اي حد متابع كورة بشكل عام – مش مجرد بيتفرج عليها علشان صلاح – عارف الموضوع ده كويس جدا

دي لقطة لاحمد عفيفي علي DMC Sport في توقعاته لنهائي دوري الابطال قبل الناتش بيوم
احمد كمحلل كروي اكد ان راموس هايضرب صلاح لان دي طريقة راموس

الموضوع مش سحر ولا فيه تخمينات، اي حد متابع كورة هايبقي عارف ده، دي شخصية راموس الوسخة واظن الفيديوهات اللي فوق اكدت ده، فالضربة متعمدة من راموس لصلاح…طبعا متعمدة …لكن فكرة اننا نعمل عريضة يمضي عليها حتي كتابة هذه اللحظة اكثر من 370 الف شخص علشان نطالب الفيفا والويفا انهم يوقفوا  راموس دي حاجة من دروب الخيال

والموضوع ده فعلا انه يتنشر كده والناس فاكرة نفسها بتعمل حاجة وشخصيات كبيرة وعامة تشارك فيه والموضوع كله بلح واي حد فاهم كورة عارف انه بلح ولسه الناس بتشارك فيه…


والموضوع بقي دلوقتي بقي مليان هبد و الهبد بقي يترد عليه بهد واخدنا منحني تاني خالص
فالموضوع فعلا دخل في مناطق غريبة جدا…ممكن نلخصها بالبوست ده

الموضوع فعلا دا في ناس كمان وصلت لكابتن ماجد و بيطمنو المصريين انهم هيكسبو كاس العالم علشان كابتن ماجد كتفه اتكسر في حلقة قبل كاس العالم و بعدها رجع و كسب مش عارف فين و ناس بتستشهد بايات قرآنية و في جو تنمية بشريه و حوارات عجيبة

راموس لعيب وسخ يا جماعة مفيش اتنين هايختلفوا علي كده، اه رفع كاس العالم 2010 مع اسبانيا و اليورو 2012 و خد بطولة اوروبا 4 مرات ده غير كاس العالم للأنديه … كل ده لا يمنع انه لعيب وسخة، بس دا حاجة واللي احنا بنعمله ده حاجة تانية خالص…الموضوع دلوقتي قلب خناقة و وطنية وجمهور الملكي بيزيط علي الناس وبيستشهدوا بان فيفا 98 كان فيها زارز انك تضرب اللاعب من غير كرة وحاجة قمة الرد علي الهبد بهبد اعظم …وحاجة تحزن والله

دا غير بقي اللي بيتكلموا عن التفاعل علي صفحة راموس بالشتيمة والـ Angry Face واللي رجعوا معدل اللايك ليه تاني بعد ما كان بيقل بقاله فترة

طبعا احنا وضحنا قبل كده ان اساس فكرة الشتيمة والـ Angry Face غلط…لانهم بيحققوا هدف عكسي  وان كل حاجة ليها طريقتها، طبعا الناس بتعمل كده علي اعتبار ان ده Negative Feedback ..لكن للاسف التفاعل دا Positive Feedback لان الـ Negative Feedback بتقي انك تعمل Unlike للصفحة، تعملها Report  او حتي Hide Posts… لكن تدخل تشتم وتعمل Angry Face  … حضرتك بتفيده مش بتضره.
ولو حابب تتأكد احب اقولك ان بعد الظيطة والهبد والعريضة اللي اتعملت
الويفا اختارت راموس من ضمن التشكيلة المثالية للموسم ده لدروي الابطال .

احنا كل ده مش بنجيب سيرة ان اي استفتاء بيدخل اسم محمد صلاح فيه بيكسب… اي استفتاء بالمعني الحرفي للكلمة

فياريت نستغل الحاجة بطريقة صح، ومنخليش الهبد بتاعنا يضيع اي قضية ممكن نتكلم فيها،
لان لسه في ناس بتكتسب قضايا بقوة الـ Social Media زي مقاطعة المغرب حاليا …وناس مبتعملش حاجة غير انها تتريق وتهبد وبس

فالتريقة مش وحشة، لكن انك تبقي مبتعملش حاجة غيرها دا مش صح،
متسبش فرصتك من ايديك وترجع تعيط لما حد يستغلها ضدك

تحديث ١: “الاعلامي” احمد موسي  اللي قبل كده جاب فيديو من لعبة Apache Air Assault وعرضها علي انها فيديو لضرب روسيا لقواعد في سوريا  واتفضح في كل المواقع والجرايد العالمية  بيشارك بهبدته معانا في لقطة صلاح و عمل مداخلة في برنامجه لواحد محامي قال انه هايطلب مليار يورو تعويض من راموس وفريق ريال مدريد نتيجة اصابة صلاح، وكالعادة ابتدي الموضوع يتنشر ونتفضح اكثر

تحديث ٢: دا بوست من الحساب الشخصي لفرج عامر، فرج عامر ده يبقي رئيس لجنة الشباب و الرياضه بالبرلمان المصري
و رئيس مجلس ادارة مجموعة شركات فرج الله  و رئيس مجلس ادارة نادي سموحه الرياضي الاجتماعي

احدث الـ “هبد”: خالد الجندي إصابة محمد صلاح مؤامرة على الإسلام.. من اللوبي الصهيوني..  #تجديد_الهبد_الديني

 

 

Social Media Trainer/Social Business Strategist Helping you build your online identity through Social Media

التعليقات مغلقة.