كيفية استخدام الهاشتاج؟

سوال: هو ليه الناس بتتريق علي الناس اللي بتكتب هاشتاج كتيير؟ وهو المفروض استخدم الهاشتاج – خاصة- علي الفيس بوك ازاي؟ واختار اسم الهاشتاج ازاي؟

المفروض ان الاستخدام الاشهر للهاشتاج كان علي تويتر…تويتر مفيش فيه مفهوم “الصفحات او الجروبات زي الفيس بوك …فكانت الناس لما تحب تتجمع كانت بتتكلم علي “هاشتاج معين”..فهتلاقي ان استخدام الهاشتاج كان بيربط/بيجمع الناس اللي بتتكلم عن حاجة/موضوع معين.

بعدها ابتدي يستخدم بفكرة الـ Tags: وهي انك تجمع تويتات/بوستات بتكتبها كل فترة عن نفس الموضوع … كمثال انك بتكتب عن #SocialMediaTips او #FacebookMarketing
فلما الشخص يدوس علي الهاشتاج يلاقي معظم الحاجات اللي اتكتبت فيه… دي الاستخدامات الاشهر بخصوص الهاشتاج

اختار اسم الهاشتاج ازاي؟
بشكل عام يفضل يكون الاسم “صغير و مميز” لهدف ان الناس تفتكره بسهولة وتتفاعل معاك عليه…ويفضل تكتب نفس الهاشتاج لفترة.
لو انت هاتعمل محاضرة/مؤتمر/ايفينت:
اختار اسم مميز … وخلي الاسم يبقي ليه علاقة بالحدث اللي انت هاتعمله … وممكن تعمله مرتبط بوقت معين
مثال: موقع Social Media Examiner​ خلي الناس وقت مؤتمر Socia Media Marketing World تتفاعل علي هاشتاج #SMMW15
هنا هو اختار اسم الهاشتاج من اختصار اسم الحدث نفسه وحدده اكتر بالسنة اللي تم فيها.

ازاي تستخدم الهاشتاج

نصائح لاستخدام الهاشتاج؟
– اختار اسم مميز واحد .. فكرة انك هاتستخدم اكتر من هاشتاج باسم ال Brand مش مفضلة.. لانك هاتشتت الناس تتابع اكتر من حاجة .. ،انت هدفك انهم يتجمعوا ويتفاعلوا مع بعض.
– اي حد “خاصة لو Brand” شوفته بيكتب هاشتاج من نوعية “اناـ فطرت ـ النهاردة ـ جبنة ـ ومربي ـ وشاي” اعمله بلوك “دي اهم نصيحة”
– استخدم علي الاكثر ٢ او ٣ هاشتاج
– اغلب المواقع بتقدم URL خاص بكل هاشتاج… ممكن تدوس علي الهاشتاج وتنشر الرابط مع الناس
– لو هاتستخدم الهاشتاج كفكرة الـ Tags ابحث الاول علي الهاشتاجات المستخدمة حاليا علشان لما تكتب الهاشتاج هاتضمن بنسبة كبيرة ان الناس اللي بتبابع الهاشتاج ده تشوف البوستات بتاعتك .. عن انك بتكتب في هاشتاج مفيش حد بيتفاعل فيه
– لو في هاشتاج عبارة عن اختصارات وانت مش فاهم الهاشتاج ده معناه ايه.. اكتب الهاشتاج هنا والموقع ده هايقولك معناه
https://tagdef.com/
– لازم تراعي انك تقدم قيمة للناس.. لو استخدامك للهاشتاج مفيش فيه معني .. افتكر ان الهاشتاج مش ملك ليك .. والناس ممكن تستخدم نفس الهاشتاج اللي انت بتكتب عليه وتستخدمه ضدك “hijacking”
– لما تختار هاشتاج ابدا استخدمه في اكتر من موقع “الفيس بوك – تويتر – انستجرام”
-كل موقع له طريقة استخدام مختلفة .. مثلا انستجرام الناس متعودة علي فكرة هاشتجات كتير … بس دا في انستجرام بس
– نوع في طريقة استخدام مكان الهاشتاج.. ممكن يبقي مرة في وسط الجملة… بلاش كل مرة تكتب الهاشتجات كلها في اخر البوست
– مهم جدا ان الهاشتاج يبقي ليه علاقة باللي انت بتقدمه … متكتبش في اي هاشتاج لمجرد انه منتشر
– اتفرج علي الفيديو ده لو بتفكر تستخدم الهاشتاج كتييييير

– ممكن تستخدم موقع TagBoard لانه بيقدملك ميزة انك تشوف تفاعل المستخدمين علي الهاشتاج الواحد في اكتر من Platform..كمثال
https://tagboard.com/facebook/search

Social Media Trainer/Social Business Strategist Helping you build your online identity through Social Media

التعليقات مغلقة.