لماذا يفشل الكثير على مواقع التواصل الاجتماعى

قرات اليوم خبر وفاة الممثل
Paul Walker
الذى قام بعمل سلسلة الافلام الشهيرة
The Fast and the Furious

قام احد اصدقائى بارسال لينك لصفحة اسمها 
R.I.P Paul Walker
قالى الصفحة وصلت ل 1,521,930
ايون ..اكتر من مليون ونص فى اقل من 24 ساعة ..صاحبى بيتكلم على اعتبار انهم عندهم ناس بتعمل اى صفحات وخلاص وبيجى عليها ناس كتيير وبتتفاعل مع الحاجات وخلاص
“عندهم فريسكا زيينا”

لما نظرت على صفحة الممثل ده الشخصية “الحقيقة” لقيت ان فريقه اللى مسؤل عن مواقع التواصل الاجتماعى الخاصة بيه لما نزل الخبر:
الخبر على الفيسبوك: حصل على اكتر من مليون ونص شخص عملوا لايك + حاولى نص مليون شخص عملوا شير + حاولى نص مليون شخص كتبوا كومنت
الخبر على تويتر: حصل على 377 الف ريتويت + اكتر من 85 الف تفضيل للتويتة دى 

نرجع لعنوان الموضوع ..ليه كتير من الناس بتفشل على مواقع التواصل الاجتماعى

اغلب الناس “وخاصة الشركات” بتفشل لانهم بيفكروا فى الانترنت بشكل عام ومواقع التواصل الاجتماعى بشكل خاص
بنفس فكرهم فى استخدمهم للتلفزيون
الفكر اللى بيقول انك هاتستخدم نفس الطريقة فى انك تقعد تتكلم عن نفسك وعن منتجك “طريقة التلفزيون” على الانترنت وهاتوصل لناس كتير اكتر من اللى هاتوصلهم فى التلفزيون و..ببلاش 

اى حد بيفكر بالشكل ده لازم هايفشل
مواقع التواصل الاجتماعى نجحت وحققت مكاسب لانها نجحت فى انها تجمع الناس ..نجحت لانها قدرت تقوى الترابط بين
الناس  وقدرت تختصر الوقت والمسافات بين الناس وتخليهم على تواصل دائم مع بعض 

اقرأ: عن حقيقة التكنولوجيا والتسويق لفكرة الترابط بين الناس 

لو مقدرتش تحقق الترابط ده بين الناس ..هاتفشل ..لان الموضوع ببساطة
Only, ideas that spread wins

وانت بكلامك عن منتجك وخدمتك ..واهمالك لكلام الناس ومحاولة التفاعل معاهم ولو بجزء من “وقتك الثمين” فى اهتمامتهم
مش هايحقق التواصل ده 

والفشل اللى انا اقصده بيشمل الشركات الكبيرة ..شوف اى شركة بتعمل اعلانات اد ايه وبتدفع فيها كام قبل ما تتكلم ان صفحاتها بتنجح وبتحقق تفاعل 

فلو انت معندكش الامكانيات تدفع نفس المبالغ ولفترات طويلة .متحاولش تقلدهم لانك هاتفشل..

 الفكرة انه حتى لو اى شركة صغيرة بتقدم قيمة للعميل دخلة منافسة مع اكبر شركة بتصرف اعلانات والشركة اللى بتقدم قيمة عندها ربع ميزانية الشركة الكبيرة – مع الوقت – الشركة الصغيرة “او حتى لو كانت كبيرة” دى هاتحقق نتائج اكبر بكتييير …
ودا عن دراسة فى امثلة مختلفة

اقرا : عن قيمة العميل..حوار ببين الشركات

طيب انا ليه اخترت الممثل دا فى انى اتكلم عليه بخصوص الموضوع ده مع انى كنت ممكن اشرحه على اى شركة تانية؟

اولا حدث موت الممثل حصل وانتشر النهاردة الصبح ..ودا بيمثل اهتمامات لناس كتير “محبى افلامه” والناس اللى بتابع الاخبار بشكل عام ..فقلت اطبق فكر
Realtime Marketing
فى انك اكلمك عن حاجة منتشرة دلوقتى وسهل تتفاعل فيها او تعرف عنها اكتر “حتى ولو من قبيل انك تعرف الخبر نفسه” لان العالم معظمه مهتم بيه, عكس ما اكلمك عن حاجة موجودة من فترة ومفيش عندك اهتمام تشوفها 

ثانيا: نسبة التفاعل على مواقع الممثل الحقيقة والصفحة المميزة “بقوا اكثر من صفحة”
بيدل على ان الناس بتتفاعل مع الاحداث وبتحب تشارك فيها.
وللاسف الشركات عندنا بتشعر انهم بيحاربوا طبيعة الناس
فى انهم يتكلموا ويعبروا عن نفسهم “الا
فى حالة انك هاتعمل طلب شراء لمنتجهم

ثالثا: اتفرج على صفحات الشخص دا على الفيسبوك و تويتر
وشوف ازاى الناس اللى بيشتغلوا على المواقع دى بيفهموا يعنى ايه
Online Personal Branding
المبدأ اللى مختفى من عندنا اصلا

رابعا “ودا الاهم” : شوف ازاى الناس بتدير اكتر من قناة “فيسبوك وتويتر مثلا” وازاى المحتوى بيتنوع “وخليك فاكر اننا بنتكلم عن شخص بيعيش حياة ” مش شركة تقدر تنفذ حاجات كتير وتتكلم عنها فى نفس الوقت ..

هتلاقى ان اغلب المحتوى مختلف عن التانى حتى المتشابه بيغيروا الصور بتاعته اوبيغيروا فى الكلام 

دول حتى لما بيقرروا ينشروا نفس الخبر اللى نزلوه على الفيسبوك على تويتر ..بيكتبوا التويتة على تويتر بحيث تكون مختلفة عن اللى موجودة عن الفيسبوك ويظبطوا الموضوع ويكتبلك  كلمة المزيد بحيث تقرا كلام مفهموم ويديلك فى الاخر اللينك..مش زى الجريمة اللى بتعملها شركات كتير وتربط الفيسبوك بتويتر 


حاول تعمل حاجة تهم العميل ..وحاول توضح ده ..اعطى مساحة للعميل يتكلم علشان ينشر فكرتك وقولى ايه رأيك؟

شاركنا لو تعرف امثله ناجحة او فاشلة فى الموضوع ده؟

Social Media Trainer/Social Business Strategist Helping you build your online identity through Social Media

يجب أن تسجل دخولك لكتابة تعليق.