تجميع لمحاولات تفّكر
اللى فاكر جهله بأمرا ما يشفع ليه،
ده تناسى ان اقرأ اول كلمة نزلت على نبيه
لا يوجد حقوق ملكية، انسخ ما تشاء
لو التفكير مكنش عبادة يبقي ايه لازم الغيب
لولا إن التفسير إتطور كان زمانها خلاص مش آيه
يسقيك ولا يرويك
لقيت الناتج صفر، اسف لو ضيعت وقتك

 

تصنيفات

الهدف السؤال وليس الاجاية
اسعي، و علّم عشرة
قادر ، والدليل ان الحياة مهزمتكش
من وانت بتحبي وهي بتحاول متقومكش

الدنيا مبتديكش اللي انت شايفه عليك كتير 
ما دام هتحلم .. اوعى تحلم الا حلم كبير 
في ناس وصولها راح هدر عشان لحظة تأخير 
سابق بشراسة … كإنك بادئ الأخير

عاندي فينا أكتر … لسه فينا حيل نعاندك
تيجي فينا ايه يا دنيا … ورينا اللي عندك
اقفي بيننا وبين هدفنا ، وأخريلنا ساعتك
هنوصل في الميعاد ، ونحتفل داخل ملاعبك

 

أصلحوا الأسرة ينصلح المجتمع

الغريب ان المجتمع بيسمح بس للراجل يختار عروسته .. يعني تلاقي واحد بكرش و حشاش و اخره بيروح ينام في شغله و يقولك لا يا عم انا عايز واحدة متدينة و بنت ناس و من عيلة و تهتم بجسمها وبشكلها و ليها انشطة مجتمعية .. وهو اكبر نشاط اجتماعي بيعمله انه يتصاحب على بتاع الكشك ..

او واحد تاني ربنا كرمه و اشتغل شغلانة عدلة و راح جيم اسبوعين .. تلاقي حاطط ليستة طول بعرض تجمع صفات رابعة العدوية مع جيسيكا سيمبسون و مدام كوري مع انجيلينا جولي و يقولك اقل من كده ماقبلش ..

وكل ده مش هو المشكلة .. حق كل واحد يحلم بتركيبة مثالية تبقى شريك حياته .. بس المشكلة هو ليه الحق ده حصري عالولاد .. يعني ليه البنت لو قالت على عريس تخين تبقى بترفص النعمة و ربنا هيزيحها من وشها .. ليه لو قالت عليه ﻷ اصله مش بيفسحني ف عايز اسيبه يتقالها انتي فاكرة الحياة كلها فسح .. ليه مجرد ان البئف المتقدم للخطبة معاه فلوس ده بيخلي القبول من نصيبه من جانب اسرة البنت حتى لو هي مش طايقاه ..

و تلاقي مع كل قصة مش مكتملة او عريس اتقدم و اترفض السكاكين جاهزة لدبح البنت باعتبارها اكيد هي اللي غلطت يا اما عينها فارغة يا اما مابتقدرش النعمة يا اما خليكي كده قاعدة في ارابيزنا (اللي مايعرفش يعني ايه ارابيز يبقى يسأل اهله عليها 🙂 ) وهو حبيب قلبي العريس الغلبان يتقاله بكرة تجيلك ست ستها تعيش خدامة تحت رجليك !!!

انا مش فيمينست ولا عندي عقدة من الرجولة .. انا بس قرفان من مجتمع بيدمر كل فرصة لتكوين اسرة سوية تصبح لبنة في مجتمع انضف قائمة على الحب والتفاهم ورعاية كل طرف للطرف الاخر ويستبدلها بكارت بلانش للرجل انه حقه يختار و يفلي و يعرف الف واحدة قبل مايستقر على واحدة في المقابل يحرم على البنت ما أحله الله لها انها تختار شريك حياتها اللي هي -هي بس- تشعر انه هيحميها و يحرسها و يشيلها في عينيه علشان تعرف تكون معاه مجتمع صغير ناجح يبقى نواة لمجتمع كبير ناجح .. مش مجتمع مريض لدرجة اصبحت الثوابت والأساسيات مجرد ذكرى و الصح والغلط اتمرمغوا في النسبية حتى كادوا ان يمتزجوا تماما .. مجتمع عايش على 3 أساطير لم يعد لهم أي اساس من الصحة :
– شهامة و جدعنة المصريين
– أخلاق ولاد البلد
و طبعا – شعب متدين بطبعه ..

أصلحوا الأسرة ينصلح المجتمع ..

https://www.facebook.com/muhammadsayedrashad/posts/10152807817260707

انتقل إلى أعلى