تجميع لمحاولات تفّكر
اللى فاكر جهله بأمرا ما يشفع ليه،
ده تناسى ان اقرأ اول كلمة نزلت على نبيه
لا يوجد حقوق ملكية، انسخ ما تشاء
لو التفكير مكنش عبادة يبقي ايه لازم الغيب
لولا إن التفسير إتطور كان زمانها خلاص مش آيه
يسقيك ولا يرويك
لقيت الناتج صفر، اسف لو ضيعت وقتك

 

تصنيفات

الهدف السؤال وليس الاجاية
اسعي، و علّم عشرة
قادر ، والدليل ان الحياة مهزمتكش
من وانت بتحبي وهي بتحاول متقومكش

الدنيا مبتديكش اللي انت شايفه عليك كتير 
ما دام هتحلم .. اوعى تحلم الا حلم كبير 
في ناس وصولها راح هدر عشان لحظة تأخير 
سابق بشراسة … كإنك بادئ الأخير

عاندي فينا أكتر … لسه فينا حيل نعاندك
تيجي فينا ايه يا دنيا … ورينا اللي عندك
اقفي بيننا وبين هدفنا ، وأخريلنا ساعتك
هنوصل في الميعاد ، ونحتفل داخل ملاعبك

 

أنا معترض على طريقة إدارة السعودية للحج وللعمرة

داخلين على عيد الأضحى وعندي كلمتين محشورين في زوري, أنا معترض على طريقة إدارة السعودية للحج وللعمرة, التعامل الرأسمالي مع الرحلة المقدسة دي مش صح, إحنا هنا مش بنتكلم عن سياح رايحين يتفسحوا بمزاجهم في برشلونة ولا باريس, إحنا بنتكلم عن واجب مقدس لأكثر من مليار ونصف مسلم وواحد من أركان الإسلام الخمسة, وبالتالي الطلب عليه Inelastic ومهما زادت تكلفة الحج والعمرة هنفضل نروح, لأننا ببساطة معندناش مكان بديل نحج ونعتمر فيه
المملكة بتتعامل مع مكة بمنطلق رأسمالي بحت, وبتديرها كأنها منشأة سياحية هدفها تعظيم الأرباح على غرار إدارة ديزني لاند أو متحف اللوفر, السعودية بتحقق دخل من الحج والعمرة تتراوح أرقامه من 5 الى 18 مليار دولار سنويا (ثاني أهم مصدر للدخل بعد البترول والغاز), يعني أحيانا بيكون ثلاث أضعاف دخل قناة السويس أحد أهم الممرات الملاحية بالعالم والهادفة للربح والربح فقط, الأرباح دي بتتحقق من شركات السياحة والطيران والفنادق والمطاعم والمحلات وشبكات المحمول, اللي طبعا الحكومة بتفرض عليهم ضرائب عشان تحقق دخل, ده غير شوية تفاصيل إضافية خفيفة كده, زي إن السعودية قررت تطلع أرباح من الأضحيات وعملوا مشروع خاص للإفادة من الهدي والأضاحي بيديره البنك الإسلامي للتنمية بتكليف من الحكومة السعودية، والبنك أسس مصنعين لاستخلاص مادة الجيلاتين الحلال المستخدمة في صناعة الكبسولات الطبية بطاقة إنتاجية تصل الى مليار كبسولة سنوياً!
المؤلم هنا هو مين اللي بيدفع الأرقام دي, معظم الأموال دي هي عبارة عن مدخرات سنين لمسلمين معظمهم فقراء من باكستان واندونسيا ومصر والسودان وبنغلاديش, هل من العدل إن الفلوس تخرج من جيوب شعوب دول فقيرة وتدخل جيوب واحدة من أغنى الدول بالعالم؟
الحج والعمرة جوهرهم الطاعة والمساواه, كلنا بنلبس قماش أبيض شبه الكفن, ممنوع حد يلبس Brand ولا ساعة ولا اي حاجة بتدل على اي تميز اجتماعي, فقط كلنا إنسان أمام الله, معنى عميق ورائع, لكن ده بيتشوه تماما على بعد خطوة واحدة خارج الحرم, لما تتصدم انك محاط بأفخم الأبراج والفنادق العالمية والمولات وساعة ناطحة للسحاب إرتفاعها نصف كيلومتر في السماء على غرار ساعة بج بن, الناس اللي كانوا “كأسنان المشط” من دقيقة واحدة بمجرد خروجهم خطوة خارج الحرم المشط اتكسر ميت حتة, بمجرد الخروج من الحرم الاغنياء من طريق والفقراء من طريق, ضربنا عمق فكرة الحج والعمرة في مقتل, وينقطع إتصالك الروحاني مع الله قبل أن يبدأ
في تقرير سعودي بيقول ان متوسط انفاق الحاج الواحد القادم من خارج المملكة هو 4,633 دولار أمريكي شامل إقامته, في أحد السنوات السعودية حققت دخل 10 مليار دولار قي عشرة أيام فقط وفقا للغرفة التجارية بمكة, ال BBC عملت لقاء من واحد من حيتان العقارات في مكة وقال نصا إنه بيستثمر في مكة منذ 35 عام, وأول متر أرض إشتراه كان ب 3 دولار, النهاردة بقى ب 22,000 دولار!! وبلاش نتكلم عن الآثار الإسلامية اللي إتبنى عليها كل قلاع الرأسمالية دي مصيرها ايه
عشان ماتفهمنيش غلط, انا مش عايز الحجاج والمعتمرين يناموا على الأرض أو يتقشفوا, بالعكس تماما
أنا شايف ان مكة لازم تدار بفكر المنظمات غير الهادفة للربح NPOs, مش بعقلية الشركات الرأسمالية, تقدر المملكة تؤسس منظمة قابضة غير هادفه للربح, ويكون أهدافها مبنية على القيم المستوحاه من عمق الإسلام بشكل عام والحج بشكل خاص, يعني أهدافها تكون توفير فرص متساوية لكل مسلمي العالم للحج والعمرة, بغض النظرة عن حالته المادية, وتبني غرف فندقية مكيفة ونظيفة بمستوى وسعر موحد للجميع, من الوزير للغفير, كمان تلغي اي ضرائب او رسوم على شركات الطيران او التأشيرات, ببساطة وظيفة المنظمة إنها تتأكد ان الحاج أو المعتمر مادفعش غير تكلفة رحلته المقدسة خالية من أي ربح, وإن الكل متساو في الإقامة والخدمات المقدمة, مفيش مسلم قاعد في جناح ملكي وآخر قاعد في اوضه غير مكيفة, كلنا بناخد نفس الخدمة الجيدة, وتقدر كمان المنظمة دي إنها تجمع التبرعات, عشان يقدروا يعملوا توسعات أو أعمال إنشاء أو توفير حج/عمرة مجاني للفقراء, مصر اللي فيها 90 مليون فقط, عملت مستشفيات بتعالج أمراض مكلفة للغاية بجمع التبرعات فقط, ما بالك ب 1.7 مليار مسلم, ده احنا ممكن نوفر إقامة فندقية مجانية للجميع أو أكتر, كمان لازم تحافظ المنظمة على الطراز المعماري العام في مكة, ماينفعش يكون التوسع رأسيا الى أعلى, ماينفعش يكون في ناطحة سحاب, التوسع لازم يكون أفقي بشكل أكبر, ماينفعش ساعة ضخمة تخطف الأضواء من مشهد بيت الله الجليل ده
الحج مش صناعة, ولا سلعة مقدسة سعرها بيزيد مع زيادة الطلب عليها, في الاسلام, ربنا بتقابله خمس مرات يوميا مجانا, بتدعي له من دون وسيط وبلا تكلفة, كمان الحج لازم يكون كده, انا مش بقول انه يكون مجاني, كل شيء له تكلفة ولازم المسلم يتحمل المسئولية, الحاج أو المعتمر يدفع تكلفة رحلته وإقامته خالية من أي ربح أو ضرائب ورسوم, عشان الفلوس ماتطلعش من جيوب الفقراء وتدخل جيوب الأغنياء تحت غطاء القداسة

داخلين على عيد الأضحى وعندي كلمتين محشورين في زوري, أنا معترض على طريقة إدارة السعودية للحج وللعمرة, التعامل الرأسمالي…

Posted by Mostafa Namira on Tuesday, September 6, 2016

انتقل إلى أعلى