مدونة أسود و أبيض

تجميع لمحاولات تفّكر
اللى فاكر جهله بأمرا ما يشفع ليه،
ده تناسى ان اقرأ اول كلمة نزلت على نبيه
لا يوجد حقوق ملكية، انسخ ما تشاء
لو التفكير مكنش عبادة يبقي ايه لازم الغيب
لولا إن التفسير إتطور كان زمانها خلاص مش آيه
يسقيك ولا يرويك
لقيت الناتج صفر، اسف لو ضيعت وقتك

 

تصنيفات

الهدف السؤال وليس الاجاية
اسعي، و علّم عشرة
قادر ، والدليل ان الحياة مهزمتكش
من وانت بتحبي وهي بتحاول متقومكش

الدنيا مبتديكش اللي انت شايفه عليك كتير 
ما دام هتحلم .. اوعى تحلم الا حلم كبير 
في ناس وصولها راح هدر عشان لحظة تأخير 
سابق بشراسة … كإنك بادئ الأخير

عاندي فينا أكتر … لسه فينا حيل نعاندك
تيجي فينا ايه يا دنيا … ورينا اللي عندك
اقفي بيننا وبين هدفنا ، وأخريلنا ساعتك
هنوصل في الميعاد ، ونحتفل داخل ملاعبك

 

البحث عن المتعة هو سبب المخاطرة

اتفرج امبارح على فيديو جون لمسعود اوزيل

2/11/2016

Arsenal Vs Ludogorets

كررت الفيديو اكثر من مرة … كشخص مالوش في الكورة لدرجة اني احتجت ادور على اسمه ازويل في جوجل ازاي بيتكتب ده شيء غريب
في اول مرة لما شوفت الفيديو بشكل مباشر قولت هو ليه ماشطش الكورة في الجون علطول … ليه بعد لما عدي الحارس وقفها وقرر يرقص المدافعين؟ كررت الفيديو ما يزيد عن20 مرة لمحاولة إيجاد إجابة على السؤال
السؤال بالنسبالي كان سؤال عن نظرة للحياة مش سؤال كروي … ليه حد يكون قدامه شكل مباشر وسهل ومضمون لتحقيق هدفه وشغله ويقرر يعمل ده بشكل تاني في درجة مخاطرة أكبر

دخلت على عدد كبير من اللي عاملين share للفيديو يمكن الاقي إجابة مالقتش إجابة للسؤال بس لقيت اشادة غير طبيعية بجمال الجون وقد ايه هو ممتع ليهم بعضهم كنت انه اجمل جون في البطولة دي… اظن ان بعد مثلا المرة ال 50 من إعادة ال gif فهمت السبب … عمر الجون ما كان هيبقي بالمتعة دي لو كان شاطه علطول
البحث عن المتعة هو سبب المخاطرة ..البحث عن درجة متعة اعلي … اوزيل لم يكتفي بانه عدى الحارس بشكل ممتع بالنسبالي لكنه قرر يستمتع اكثر ويمتع الجمهور اكثر حتى الجمهور الغير مهتم بالكرة

افتكرت وقتها قصة مرة قريتها عن د. عبد الوهاب المسيري بيحكي انه بعد لما انهي دراسته في أمريكا وكان راجع مصر وكان محوش قرشين كان قدامه خيار من اثنين …يرجع مصر بشكل مباشر ووقتها هيرجع معاه قرشين (تحويشة العمر) أو انه يلف أوروبا قبل لما يرجع مصر بس وقتها هيرجع معهوش فلوس … وانه كان قراره انه ياخد المخاطرة ويستمتع برحلة اوربا كانت فيها جزء بالباخرة تقريبا في مقابل مخاطرة انه هيرجع بدون فلوس

فكرة المخاطرة من اجل المتعة …فكرة ان الشغل مش لازم يتعمل بشكل المباشر علشان بس تاخد فلوس في الاخر ..الفكرة دي تقريبا فضلت مسيطرة عليه اغلب اليوم امبارح

حاولت افتكر اخر مرة قررت اخد فيها مخاطرة علشان انبسط في الشغل تقريبا كانت في 2012 من اكثر من 4 سنين … بعدها تقريبا عجزت بقيت بحسب الحاجات بتفصيل شديد وبحاول اخد أئمن الطرق وأكثرها مباشرة للوصول للهدف …بقى اهتمامي منصب على انهاء الشغل ..ده للأسف بيكون من عيوبه ان بفقد جزء كبير من المتعة اللي علشان الواحد ياخدها لازم يكون معاها مخاطرة عالية

يمكن اوزيل لو كانت ضاعت الكورة كان هيندم معرفش الحقيقية أهمية الجون في الماتش ولا أهمية الماتش … يمكن أساسا هو مفكرش في المخاطرة مقابل الاستمتاع … يمكن انا بحمل الجون اكثر مما يحتمل

يمكن د. عبد الوهاب المسيري لو عاد بيه الزمن كان غير قراره ورجع مصر علطول ..يمكن أساسا القصة غير حقيقية … يمكن انا بحمل قصته ما لم تحتمل

أيا كان مدى حقيقة موقف اوزيل و د. المسيري بس مجرد تفكيري في موقفهم بالشكل ده ..هو شبيه ببنت في بدايات الثلاثنيات بتدور على ادلة حتى لو اضطرت للي عنق الايات علشان تلاقي دليل ان الحجاب مش فرض وتقلعه
لو كنت مكان البينت لوجدت ان من حقي ان اخلع الحجاب دون محاولة البحث عن أي ادلة …من حقي ان اجرب الإحساس
اظن اني حاليا من حقي ان اخد المخاطرة في الشغل وفي الحياة في سبيل السعي للاستمتاع … مش عارف اذا كنت هقدر اخدها ولا لأ وهاخدها ازي …بس اتمني ان بعد فترة اكتب اني خدتها واني استمتعت بالمخاطرة حتى لو خسرت جزء ما من تحقيق الأهداف… فالمتعة تستحق المخاطرة

ملاحظة أخيرة … دي مش دعوة لأي حد يسيب شغله وانا شخصيا مش بفكر اسيبه على قد ما بفكر اعمل حاجة جنبه فيها مخاطرة شخصية . اوزيل لما خد المخاطرة كان عنده من الرصيد ما يسمح له بالمخاطرة حتى لو الجون مجاش , د. المسيري لما كان راجع مصر كان عنده من الرصيد ( دكتوراه وراجع يشتغل أستاذ في الجامعه ) ما يكفي للمخاطرة

 

اتفرج امبارح على فيديو جون لمسعود اوزيل كررت الفيديو اكثر من مرة … كشخص مالوش في الكورة لدرجة اني احتجت ادور على…

Posted by Mohamad Ansary on Thursday, November 3, 2016

انتقل إلى أعلى