تجميع لمحاولات تفّكر
اللى فاكر جهله بأمرا ما يشفع ليه،
ده تناسى ان اقرأ اول كلمة نزلت على نبيه
لا يوجد حقوق ملكية، انسخ ما تشاء
لو التفكير مكنش عبادة يبقي ايه لازم الغيب
لولا إن التفسير إتطور كان زمانها خلاص مش آيه
يسقيك ولا يرويك
لقيت الناتج صفر، اسف لو ضيعت وقتك

 

تصنيفات

الهدف السؤال وليس الاجاية
اسعي، و علّم عشرة
قادر ، والدليل ان الحياة مهزمتكش
من وانت بتحبي وهي بتحاول متقومكش

الدنيا مبتديكش اللي انت شايفه عليك كتير 
ما دام هتحلم .. اوعى تحلم الا حلم كبير 
في ناس وصولها راح هدر عشان لحظة تأخير 
سابق بشراسة … كإنك بادئ الأخير

عاندي فينا أكتر … لسه فينا حيل نعاندك
تيجي فينا ايه يا دنيا … ورينا اللي عندك
اقفي بيننا وبين هدفنا ، وأخريلنا ساعتك
هنوصل في الميعاد ، ونحتفل داخل ملاعبك

 

انا عايز الناس تنسى السياسة

انا عايز الناس تنسى السياسة والحكم والكلام ده وتسيبه لأهله المفوضين ويركزوا فى حياتهم ، وكمان يتغاضوا عن موضوع الأسعار مش مشكلة .. عادى

أنا بس عايز الناس تعمل ترمومتر او مقياس ممكن نسميه حقوق الأنسان الاول او حقوق الحيوان المتطور ونشوف من خلاله وضع الحياة وممارساتها فى ضوء ده ، يعنى انا تقديرى إن مصر دى طول عمرها بلد فقران فى متع الحياة والممارسات اللى بتبعث على الفرح فيها قليلة ومحدودة بس كانت منتظمة ، زى كده إن الناس تروح تشوف افلام فى السيما ، تروح تتفرج على متش كورة فى الاستاد ، تاكل أكلة كويسة فى الأعياد ، تخش فى جدالات تحسسها انهم بنى ادمين وجزء من العالم فيتسلوا ، يصيفوا ، حاجات كده يعنى .

وانا والله بما يرضى الله شايف ان مناطق المتعة البسيطة دى بقت مضروبة بالنار مش لأسباب أقتصادية بالضرورة بس لأن فيه نزوع لإستئصالها او على الأقل التسامح مع استمرار الحياة بدونها ، يعنى البلد دى مبقاش فيها صناعة سينما منتظمة تسلى الناس ” حلوة او وحشة ” ومبقاش فيها دورى عام بجمهور الناس تروح تتفرج عليه وتعيش الحالة لان الجمهور ببساطة اتقتل عمدا فى 2014 ، لما ييجى شم النسيم واللى هو مناسبة ان الناس تاكل فيه سمك معفن بيحبوه ممكن عادى يطلع مذيع تلفزيون يشتمهم ويقولهم بتاكلوه وتصرفوا ليه منتوا معاكوا فلوس اهوه ، بيتشن حملة كراهية وتشكيك على كاتب ادب تسلية للجيب لأن جمهوره زعل عليه لما مات فجأة ، حتى التسلية القايمة على الوهم زى ان لما الخماسين والحر والتراب ييجوا فيقوموا مشغلين فى التلفزيون أغنية الدنيا ربيع والجو بديع فيكتشفوا إن سعاد حسنى وهى لابسة فستان أحمر جت لقطه واحد شايلها على كتافه فكان كلوتها باين بالنسبة له فحذفوا اللقظة المشينة بعد 43 سنة من عرضها ، دلوقتى قهاوى بقت بتمنع الولاد والبنات يقعدوا سوا عليها ويطلبوا منهم ” قسيمة الجواز ” وده فى ظل شائعات ان بعض الصيدليات بقت بتطلب قسايم جواز من السيدات اللى عايزه تشترى حبوب منع حمل .. طب أيه كده بقى ولحد فين وايه المطلوب وده حيقف امتى وايه غرضه النهائى .. حقيقى شيئ مش مفهوم ، واللى مش مفهوم بالنسبة لى هو السرعة والتفنن والشغف فى تبيان كراهية الحياة .. انا حاسس اننا حنوصل لمرحلة ان واحد يسأل التانى هو نتيجة متش الأهلى كام فيطلعله راجل يقوله شبراوى وحسنين عرفان .. خالد مغربى دبابة .

انا عايز الناس تنسى السياسة والحكم والكلام ده وتسيبه لأهله المفوضين ويركزوا فى حياتهم ، وكمان يتغاضوا عن موضوع الأسعار…

Posted by Mohamed Naeem on Friday, April 13, 2018

انتقل إلى أعلى