تجميع لمحاولات تفّكر
اللى فاكر جهله بأمرا ما يشفع ليه،
ده تناسى ان اقرأ اول كلمة نزلت على نبيه
لا يوجد حقوق ملكية، انسخ ما تشاء
لو التفكير مكنش عبادة يبقي ايه لازم الغيب
لولا إن التفسير إتطور كان زمانها خلاص مش آيه
يسقيك ولا يرويك
لقيت الناتج صفر، اسف لو ضيعت وقتك

 

تصنيفات

الهدف السؤال وليس الاجاية
اسعي، و علّم عشرة
قادر ، والدليل ان الحياة مهزمتكش
من وانت بتحبي وهي بتحاول متقومكش

الدنيا مبتديكش اللي انت شايفه عليك كتير 
ما دام هتحلم .. اوعى تحلم الا حلم كبير 
في ناس وصولها راح هدر عشان لحظة تأخير 
سابق بشراسة … كإنك بادئ الأخير

عاندي فينا أكتر … لسه فينا حيل نعاندك
تيجي فينا ايه يا دنيا … ورينا اللي عندك
اقفي بيننا وبين هدفنا ، وأخريلنا ساعتك
هنوصل في الميعاد ، ونحتفل داخل ملاعبك

 

بمناسبة الإكتئاب و الطاقة السلبية

بمناسبة الإكتئاب و الطاقة السلبية .. دى حاجات أنا شخصياً جربتها و بتنفع .. و سهلة للناس اللى مجال حركتها ضيق و مش سهل يسافروا او يخرجوا كتير

– إتفرجوا على كارتون .. بقالى فترة أرجع من الشغل أقعد قدام ميكي لحد ما أنام .. بطلت أتفرج على أفلام و مسلسلات و كل حاجة برة نطاق الشغل .. Tom and Jerry is what i need

– بلاها ميكى .. إتفرجوا على فيلم كوميدى .. مسلسل كوميدى .. ستاند أب كوميدى .. مسرحية .. أى حاجة تضحك .. جربوا Last vegas مثلاً .. Blended .. و فيه افلام كوميدى كتير حلوة نزلت الفترة اللى فاتت

– إسمعوا أغانى مزيكتها هايصة شوية .. إسمعوا شعبى مش عيب .. إسمعوا حاجات تحسسكم إنكم عايزين تقوموا ترقصوا .. و قوموا إرقصوا لو عايزين .. كمية الطاقة السلبية اللى بتطلع من جسمكم بتبقى مهولة

– دوروا على حاجة مناسبة تفصلوا بيها عن كل حاجة .. فيه ناس بتحب تلون .. فيه ناس بتحب تلعب مزيكا .. أنا شخصياً إتكعبلت فى أبليكيشن BINGO بقيت لازم ألعبها كل يوم قبل مانام .. كل ماحس إنى متضايقة من حاجة .. مضغوطة من حاجة .. بتحتاج منى تركيزى كله و بتجبرنى أفصل عن كل حاجة مسخنه دماغى

– الدش السخن عبقرى .. و فيه ناس بتقول البانيو اللى فيه مية دافية بملح .. أنا ماجربتهاش بس الموضوع شكله مُغرى الحقيقة

– كلوا حاجات دسمة و مؤذية .. كلوا برجر غرقان جبنة .. بيتزا عليها كيلو موتزاريلا .. البطاطس المحمرة عظيمة .. شيكولاتة .. أيس كريم .. زلابيا .. كلوا جمبرى بدبس الرمان .. أو كبدة بدبس الرمان .. أو سجق بلدى بدبس الرمان .. دبس الرمان من أسباب السعادة أصلاً

– قطعوا حاجة .. خدوا سكينة كده و قطعوا بطاطس .. بصل .. طماطم .. فلفل .. قطعوهم حتت صغيرة قد بعض .. و إدوهم للحاجة تخزنهم بعد ما تخلصوا .. هاتطلعوا بإنكم فشيتوا غلكم شوية و بدعوة حلوة من الحاجة .. و بالنسبة للبصل علشان الدموع و الجو ده كلوا لبانة أو حطوا البصل فى الفريزر الأول شوية و حالوا ماتتنفسوش من مناخيركم .. بقكم حلو و هايقلل الحرقان كتير

– و أخيراً .. ناموا .. و لو مش عارفين تناموا .. بق دوا كحة أو حباية سيردالود و ناموا .. النوم ده حل لـ ٩٠٪ من كل المشاكل اللى فى الكون.

https://www.facebook.com/Mera.El.Gohary/posts/10154565524791438

انتقل إلى أعلى