تجميع لمحاولات تفّكر
اللى فاكر جهله بأمرا ما يشفع ليه،
ده تناسى ان اقرأ اول كلمة نزلت على نبيه
لا يوجد حقوق ملكية، انسخ ما تشاء
لو التفكير مكنش عبادة يبقي ايه لازم الغيب
لولا إن التفسير إتطور كان زمانها خلاص مش آيه
يسقيك ولا يرويك
لقيت الناتج صفر، اسف لو ضيعت وقتك

 

تصنيفات

الهدف السؤال وليس الاجاية
اسعي، و علّم عشرة
قادر ، والدليل ان الحياة مهزمتكش
من وانت بتحبي وهي بتحاول متقومكش

الدنيا مبتديكش اللي انت شايفه عليك كتير 
ما دام هتحلم .. اوعى تحلم الا حلم كبير 
في ناس وصولها راح هدر عشان لحظة تأخير 
سابق بشراسة … كإنك بادئ الأخير

عاندي فينا أكتر … لسه فينا حيل نعاندك
تيجي فينا ايه يا دنيا … ورينا اللي عندك
اقفي بيننا وبين هدفنا ، وأخريلنا ساعتك
هنوصل في الميعاد ، ونحتفل داخل ملاعبك

 

خناقة نظام التعليم الجديد

بوست طويل

الناس كلها بتتخانق في نظام التعليم الجديد علي هل العلوم و الرياضيات يتدرسوا بالأنجليزي ولا بالعربي لطلاب الأبتدائي

دي الخناقة اللي علي السطح لكن للأسف ماحدش واخد باله من التغيير الضخم اللي حيحصل في فلسفة التعليم الأبتدائي نفسها و حتخليها فعلياً حاجة تانية خالص

التغيير الضخم هو ان لما حيتطبق النظام ده مش حيكون في حاجة اسمها رياضيات ولا علوم و لا لغة عربية ولا دراسات اجتماعية اصلاً

احنا حنطبق نظام جديد للتعليم اسمه التعليم عبر المعارف المختلفة أو cross-curricular approach

ايه بقي الفلسفة اللي وراه ؟

الفكرة اننا من القرن التاسع عشر و المدارس بتدرس بطريقة العلوم المنفصلة عن بعضها
تدرس لغة عربية و انجليزي و علوم و رياضيات و تاريخ و جغرافيا في حصص منفصلة و علي أيدي مدرسين مختلفين تماماً

طيب ايه مشكلة النظام ده ؟

قول ايه مشاكله؟ !!!

طبعاً انا عارف ان في ناس حتتحمق وتقول ما احنا كلنا اتعلمنا كده وانت نفسك اتعلمت كده و طلعنا زي الفل و شغالين مهندسين و اطباء و محامين و محاسبين و الدنيا ماشية

دول بالضبط زي اللي بيقولوا ما احنا كنا بنتضرب من اهالينا و مدرسينا و طلعنا زي الفل !!!

عندي لكم مفاجأة ، ما طلعناش زي الفل ولا الحاجة

أول مشكلة هي ان النظام ده علمنا ناخد العلم من مصدر واحد ونقف عنده
يعني كتب العلوم للعلوم فقط
كتب الرياضيات للرياضيات فقط
التاريخ يعني احداث تاريخية و حروب فقط
الجغرافيا يعني تضاريس و مناخ و موقع و نشاط اقتصادي و زراعي فقط
و اللغات يعني لغات فقط

كل حصة بقت جزيرة منعزلة ، ما فيش بينهم اي ترابط
عايزين مثال من اللي درسناه ؟

قصة كفاح شعب مصر
كلنا درسناها كقصة ادبية
حد خد باله انها قصة تاريخية كمان ؟
ولا حد جاب سيرة ، ده المضحك ان كان بيبقي في بينها و بين التاريخ اللي بندرسه تناقض احياناً

يعني في كفاح شعب مصر تلاقي القصة بحكي عن بيبرس و قطز كأبطال
بس تيجي بعدها بسنتين تدرس في واأسلاماه ان بيبرس تآمر علي قطز مع المماليك و قتله

نابليون في كفاح شعب مصر كان محتل غاصب
بس في التاريخ كان قائد الحملة الفرنسية اللي كان لها عيوب بس لها برضه مميزات

انا فاكر اني اثرت التناقض ده مع مدرس اللغة العربية و احنا بندرس كفاح شعب مصر فقال لي اكتب عندي اللي في كتاب القصة و لما تروح تمتحن تاريخ ابقي اكتب اللي في كتاب التاريخ !!!

نعم ؟؟

في النظام ده الطالب بيتعلم ان العلوم جزر منعزلة رغم ان في الحياة هي مش كده
المهندس بيحتاج يربط بين كل العلوم ، لازم له الجغرافيا و التاريخ و الفيزياء و الكيمياء و الأحياء و اللغات
و كذلك الطبيب و المحاسب

صحيح انت بتمتحن في مواد منفصلة لكن ورقة امتحان الحياة ما بتجيش كده

ماحدش بيقولك حل لنا المشكلة دي مما درسته في الفيزياء
او طلع لنا افضل طريقة لحل مشكلة الموارد المائية في مصر في ضوء دراستك للجغرافيا
او اخترع الجوريثم يحيب مواقيت الهلال في رمضان مما تعلمته في التربية الدينية

الحياة اسئلة في كل المواد مع بعضها و بالتالي لازم الطالب يعمل الترابط ده من أول ما يبتدي مش في الجامعة !!!

المشكلة الثانية الضخمة هي ان كنتيجة لأن كل كتاب مستقل بذاته و كل مادة مع نفسها ، المدرسين في مدارسنا بقوا كده هما كمان

كل مادة بيقعدوا مع بعض و يحكوا مع بعض بس عمرهم ما فكروا يشتغلوا مع مدرسين بقية المواد

عمركم شفتم مدرس الجغرافيا مثلاً جايب لكم جهاز قياس الضغط الجوي اللي استلفه من مدرس الفيزياء علشان يشرح لكم نظرية الرياح و علاقتهم بالضغط الجوي ؟

طيب عمر مدرس الأنجليزي اللي بيشرح درس عن معمل المدرسة جاب معاه انابيب اختبار و مايكروسكوب او فكر ياخد الطلاب علي معمل المدرسة و يفرجهم بجد ؟
طيب هو في معمل اصلاً ؟

طيب مدرس الكمبيوتر عمره فكر يدخل معاه مدرس رياضيات و يشرحوا مع بعض النظام الثنائي للطلاب و ليه هو مهم في الحاسب ؟ طيب فكروا يجيبوا مدرس الفيزياء يشرح الترانزستور بالمرة بقي علشان الأولاد يفهموا ليه بنحتاج ندرس الحاجات دي ؟

دي كلها امثلة للجزر المنعزلة في نظامنا التعليمي Silos

و النتيجة اننا بنطلع الناس معدومي الثقافة و انصاف المتعلمين و بعد ما عودناهم يحفظوا علشان يمتحنوا و بعصا سحرية بعد الجامعة نقول لهم

عايزينكم تبدعوا بقى !!!
نعم ؟
ابداع ايه و انت حابسهم في الجزر المنعزلة

علماء العرب كلهم تقريباً كانوا cross-curricular
الخوارزمي كان فقيه و عالم لغة و بتاع رياضيات و قانون و حساب
الرازي كان فقيه و عالم كيمياء و طب و له مؤلفات في كل العلوم تقريباً
ابن الهيثم والبيروني و غيرهم
كانوا Multidisciplinary يا جماعة

حتي ليوناردو دافينشي كان رسام و نحات و كمان مهندس و مخترع

فكرة العلم اللي في كتاب ده ما بقتش تأكل و العالم تجاوزها

اللي عنده اصحاب في انجلترا او امريكا او استراليا يسألهم كده ، طلاب ابتدائي بيدرسوا ازاي
عندهم كتب في ايه بالضبط ؟

طيب علشان الناس تحل المشكلة دي عملوا ايه ؟
ايوه عملوا حاجة جديدة اسمها cross-curricular approach
يعني مافيش حاجة اسمها مدرس عربي و رياضيات و علوم
في درس حيتعلموه الطلاب جامع لهم المعرفة كلها

يعني مثلاً لو درس عن قناة السويس يبقي المدرس حيطلب منهم يقرأوا عن القناة و يفهموا تاريخها و يكتبوا عنها بحث (ما اسموش موضوع تعبير خلاص) و حيصححه لهم لغوياً و تاريخياً و ادبياً

وبعدين حيشرح لهم موقع القناة جغرافياً و يعني ايه سيناء و يشرح لهم تاريخ القناة من اول قناة سوزيستريس و خليج أمير المؤمنين لحد ديليسبس
و حيشرح حروب و سياسة و احداث حصلت حوالين القناة
وحييجي يشرح حساب من خلال القناة و يديهم مسائل من نوعية

عندنا قناة طولها ١٧٤ كم عايزين نحفرها بعمق ١٠ متر و عرض ٢٠ متر
حنحتاج نزيل كام متر مكعب تراب ؟
طيب لو العامل المصري بيشيل في اليوم ٤ متر مكعب و عايزين نخلص في ٦ سنين و ما حدش بياخد اجازة ، حنحتاج كام عامل ؟

و حنيجي نشرح قوانين السرعة و نقول لو مركبة دخلت القناة من بورسعيد متجهة للسويس و سرعتها ١٠ كم / ساعة ، حتوصل الأسماعيلية بعد وقت قد ايه ؟ و امتي توصل السويس

كده يبقي في درس واحد الطالب اتعلم لغة و رياضيات و علوم و تاريخ و جغرافيا

كده اتعلم يربط الدنيا ببعضها و يفهم العلوم و علاقتها بالحياة

بدل ما دلوقتي بتقول له متي افتتحت قناة السويس ( جوجل حيقوله في ثانيتين)
لازم نقول له ليه اتحفرت و بأيد مين ؟ و دفعنا ثمنها ايه ؟ كام عامل اتبهدلوا فيها بالسخرة ؟
بتحسن الأقتصاد ازاي ؟ وليه محتاجين نهتم بها
دي هي العلاقات المهمة و ده النظام الجديد للعمل

انا في بوست سابق شرحت يعني ايه موظف مرن ؟ و ليه محتاجينه ؟ ويعني ايه بيفهم في علوم مختلفة و يعرف يعمل حاجات تبدو بعيدة عن بعض

لما حأعلم الأولاد كده يبقي حأعلمهم من صغرهم يوسعوا مداركهم و يبصوا للحياة كوحدات مترابطة بتحكمها قوانين علمية من فيزياء و كيمياء و احياء و كمان بتحكمها علاقات البشر و السياسة و التاريخ و بنعبر عنها باللغات

فاضل اكبر تحدي في رأيي للنظام ده و هو ازاي حنجهز المدرسين له ؟
يعني ايه مدرس يبقي كشكول في كله ؟

الأجابة في بوست تاني لكن المهم ان الفكرة سليمة و مطلوبة لأن موضوع العربي و الدراسات و العلوم ده خلاص العالم تجاوزه

افتحوا لأولادنا شبابيك الحداثة و بلاش نفضل حابسينهم في بدرومات اساليبنا العتيقة

بوست طويلالناس كلها بتتخانق في نظام التعليم الجديد علي هل العلوم و الرياضيات يتدرسوا بالأنجليزي ولا بالعربي لطلاب…

Posted by Tamer Ahmed on Saturday, May 5, 2018

انتقل إلى أعلى