تجميع لمحاولات تفّكر
اللى فاكر جهله بأمرا ما يشفع ليه،
ده تناسى ان اقرأ اول كلمة نزلت على نبيه
لا يوجد حقوق ملكية، انسخ ما تشاء
لو التفكير مكنش عبادة يبقي ايه لازم الغيب
لولا إن التفسير إتطور كان زمانها خلاص مش آيه
يسقيك ولا يرويك
لقيت الناتج صفر، اسف لو ضيعت وقتك

 

تصنيفات

الهدف السؤال وليس الاجاية
اسعي، و علّم عشرة
قادر ، والدليل ان الحياة مهزمتكش
من وانت بتحبي وهي بتحاول متقومكش

الدنيا مبتديكش اللي انت شايفه عليك كتير 
ما دام هتحلم .. اوعى تحلم الا حلم كبير 
في ناس وصولها راح هدر عشان لحظة تأخير 
سابق بشراسة … كإنك بادئ الأخير

عاندي فينا أكتر … لسه فينا حيل نعاندك
تيجي فينا ايه يا دنيا … ورينا اللي عندك
اقفي بيننا وبين هدفنا ، وأخريلنا ساعتك
هنوصل في الميعاد ، ونحتفل داخل ملاعبك

 

عايزاه يحبك ؟؟ يتعلق بيكي ؟؟ مايشوفش غيرك في الدنيا ؟؟

عايزاه يحبك ؟؟ يتعلق بيكي ؟؟ مايشوفش غيرك في الدنيا ؟؟
لا لا لا .. مش هاقولك خليكي كويسة وصادقة وحبيه والكلام المهروس ده .. مابقاش ياكل خلاص .. وفي الغالب لو عملتي كده هاتخدي على قفاكي
تعملي إيه طيب ؟؟
أقولك أنا .. صلي عالنبي
أولاً .. إكدبي .. إكدبي كتير .. لو كنتي حبيتي طوب الأرض .. إوعي تبقى صريحة والجو الفكسان ده وتقوليله .. قوليله وإحلفيله لو لزم الامر إنه أول واحد عرفتيه في حياتك حتى لو عندك 40 سنة وعندك عيلين .. هو أول كل حاجة .. أول حب وأول ماسكة إيد وأول بحبك وأول وحشتني وأول راجل تشوفيه في الشارع كمان .. قبل كده كنتي فاكرة إن الدنيا كلها ستات
ثانياً .. إتموحني .. كتير برضه .. وإعملي رقيقة حتى لو بتاكلي عيال صغيرة عالعشاء بليل .. ولأ مش هايقول مالها دي .. هايتكيف جداً .. حتى لو عارف إنك بتمثلي .. هايتكيف برضه .. بس ماتزوديهاش علشان مايحسش إنك بتعملي كده مع كله وبالتالي إنتي شمال وده مش في مصلحتك خالص
ثالثاً .. خافي عليه .. لا مش الخوف الطبيعي اللي كلنا بنخافه ده .. خافي بزيادة .. إيه ده إنت بتتكلم في التليفون ؟؟ طب بص قدامك طب إقفل طب ركز إنت إزاي تعمل كده أنا لو جرالك حاجة هاموت وهوب يغمى عليكي .. إيه ده إنت عورت نفسك وإنت بتحلق ؟؟ لازم نروح طوارئ المستشفى دلوقتي حالاً لا نقطة الدم اللي نزلت دي تجيبلك أنيميا ولا هبوط حاد في الدورة الدموية إنت إزاى مش بتاخد بالك من نفسك وهوب يغمى عليكي .. كده يعني
رابعاً .. قوليله يصلي .. أول ما الأذان يأذن كلميه قوليله يصلي حتى لو مسيحي .. وحتى لو إنتي شخصياً مابتركعيهاش .. بيحبوا فشخ اللي تحسسهم إنها هاتخليهم يقربوا من ربنا .. إظبطي المنبه على معاد الصلوات وكلميه قوليله صلي .. والفجر .. أوصيكي والفجر .. مش هايتضايق إنك بتصحيه من أحلاها نومة حتى لو قالك كده .. بس هايحس قد إيه إنتي خايفة عليه من إنه يخش النار لدرجة إنك بتقلقي راحتك وراحته علشانه .. مسم .. عينيا دمعت في أخر حتة دي و النبي
خامساً .. سمعتي قبل كده عن المقولة “يتمنعن و هن الراغبات” ؟؟ حلو .. خديها إسلوب حياة بقى .. لو هاتبيضي عليه إتقلي .. لو هاتموتي وتمسكي إيده إياكي .. لو هاتخبطي راسك في الحيط وتحضنيه إخبطيها عادي مش عيب .. مش كل مرة يقولك نخرج تخرجي .. مش كل مرة يتصل بيكي تردي ودواليك بقى عيشي
سادساً .. إوعي تتجنني وتقوليله إنك بتكلمي صحابك الولاد عادي كده .. هبلة إنتي ولا هبلة ؟؟ فهميه إنك قطعتي علاقتك بأبوكي ذات نفسه لإنك مش بتكلمي ولاد غيره علشان إنتي بتحبيه ومش شايفة غيره وكل الرجالة في نظرك بعده إصفار عالشمال ومش قادرة حتى تبصي في وشوشهم إنكلودنج أبوكي برضه
سابعاً .. ماتروحيش الجامعة .. ماتخرجيش مع صحابك .. ماتزوريش قرايبك .. ماتبصيش مالبلكونة .. غيرى رقم تليفون موبيلك .. غيرى رقم تليفون البيت .. غيرى البيت نفسه لو قدرتي .. إقطعي علاقتك بكل الناس .. وقوليله أصل إنت كل أهلي و صحابي يا حبيبي
ثامناً .. خافي على فلوسه .. لو خارجة معاه وهاتموتي مالجوع وسألك جعانة قوليله لأ .. لو قعدتوا في مكان وقالك تشربي إيه قوليله مية أصلي بعمل دايت .. الرجالة حتى لو مابينوش فلوسهم بتوجعهم فشخ بقى .. ويا سلااااام لو حس إنك مش مبذرة ومش بتكلفيه كتير .. هايشوفك تصلحي تكوني زوجة مثالية .. مايعرفش يا عين أمه اللي مستنيه بس مش مشكلتنا دلوقتي خالص
تاسعاً .. كل الرجالة المُزز في الكون جنبه لازم يبقوا الشاويش عطية .. ماينفعش تقوليله الله ده مهند ده أمور قوى أو حتى تفكري فيها بينك وبين نفسك .. مافيش حاجة إسمها آسر ياسين وظافر العابدين وشاننج تايتوم وثيو جيمس .. كل دول وحشين وهو بس اللي حلو
عاشراً .. خليكي جزمة في رجله .. ولو الكلمة وجعاكي قوي مشيها خاتم في صباعه .. إوعي تتخبطي في نافوخك وتبينيله إن ليكي شخصية ورأى والكلام الفارغ ده .. يمين يعني يمين .. شمال يعني شمال .. ماتكلميش ده يبقى ماتكلميش ده .. ماتكحيش يعني ماتكحيش .. إلخ إلخ إلخ
وألف ألف مبروك ويا دبلة الخطوبة عقبالنا كلنا وبالرفاء والبنين إن شاء الله.

عايزاه يحبك ؟؟ يتعلق بيكي ؟؟ مايشوفش غيرك في الدنيا ؟؟لا لا لا .. مش هاقولك خليكي كويسة وصادقة وحبيه والكلام المهروس ده…

Posted by Riham El Gohary on Thursday, April 13, 2017

انتقل إلى أعلى