تجميع لمحاولات تفّكر
اللى فاكر جهله بأمرا ما يشفع ليه،
ده تناسى ان اقرأ اول كلمة نزلت على نبيه
لا يوجد حقوق ملكية، انسخ ما تشاء
لو التفكير مكنش عبادة يبقي ايه لازم الغيب
لولا إن التفسير إتطور كان زمانها خلاص مش آيه
يسقيك ولا يرويك
لقيت الناتج صفر، اسف لو ضيعت وقتك

 

تصنيفات

الهدف السؤال وليس الاجاية
اسعي، و علّم عشرة
قادر ، والدليل ان الحياة مهزمتكش
من وانت بتحبي وهي بتحاول متقومكش

الدنيا مبتديكش اللي انت شايفه عليك كتير 
ما دام هتحلم .. اوعى تحلم الا حلم كبير 
في ناس وصولها راح هدر عشان لحظة تأخير 
سابق بشراسة … كإنك بادئ الأخير

عاندي فينا أكتر … لسه فينا حيل نعاندك
تيجي فينا ايه يا دنيا … ورينا اللي عندك
اقفي بيننا وبين هدفنا ، وأخريلنا ساعتك
هنوصل في الميعاد ، ونحتفل داخل ملاعبك

 

عزيزي الذكر المصري أبو كرش جنان..

عزيزي الذكر المصري أبو كرش جنان..تحية طيبة وبعد..

أنت بينك وبين أقرانك الذكور في بلاد العالم المتقدم والمتخلف علي السواء فجوة كونية..ماما بتأكلك وتشربك وتذاكرلك وتغيرلك الرضعة وتعملك القهوة،وترتبلك السرير،وتمسحلك البرابير..لا بتشتغل وانت بتدرس، وقاعد لازق في بيتكم لغاية ما بابا يشوفلك بنت الحلال ويجهزك ويرستأك..اللي زيك من عوالة الكوكب بيتحنطوا في متاحف..وبيتدفع فلوس عشان السياح يتفرجوا عليهم

أنت مش بس عالة علي أهلك قبل الجواز..انت عالة تانية بعده..لا بتحط ايدك في حاجة،ولا تتقن مهنة يدوية تخليك تغير لمبة ولا تزيت باب عشان ميطلعش صوت..ولا بتذاكر لعيل مادة بتفهم فيها..آخر همك تيجي تأكل وتشرب وتتحمق أوي لو الأكل اتأخر وتتشنتح قدام التليفزيون ،تقلب في الماتشات، ولو حد طلب منك شئ، تخلع وتترمي علي القهوة لغاية أنصاص الليالي تلعب دومنة وطاولة..

أنت مش بس عالة علي أهلك قبل الجواز ومراتك بعد الجواز..أنت عالة علي المجتمع..كام سنة بعد الجواز..وكرشك يدلدل قدامك مترين..وصدرك ينتفخ وتبقي شبه الدرفيل..سنتين تانيين وتهل عليك كافة أمراض الكوكب المهجورة اللي محدش يصاب بها قبل ما يوصل سن ال 90..3 سنين كمان..واحلامك الوظيفية تنتهي،وطموحك يبقي الأكل والشرب وتربية العيلين..3 سنين زيهم ويبقي أقصي تفكيرك انك هتموت ولازم نختمها بصالح الأعمال في حين ان كهل في غرب أوروبا بيلف العالم ليل نهار..عالة مفيش منها اتنين..

أنت مش بس عالة علي أهلك،ومراتك،والمجتمع..أنت عالة علي جنسك البشري..لسه عايش في أوهام الشخط والنطر وسحق شخصية شريكة حياتك عشان تبقي حمش وشهم قدام أهلك وميتقالش عليك فلان راح وفلان جه..لسه بتترعب أن مراتك تشتغل لا تبقي أنجح منك وصوتها يبقي زي صوتك وتفقد ورقة التوت اللي بتداري بها غشوميتك وتسلطك..لسه أصلًا بتخاف من محيط تتواجد فيه ست ذكية وبتتصرف بعدائية لا نظير لها،وتطلق أبشع الصفات عشان تحط من قيمتها وقيمة ما تفعل..جنسك البشري اتطور وانت محلك سر..

بذمتك انت ايه اللي ممكن يقنع واحدة سورية ولا لبنانية ولا غربية تتجوز واحد زيك بكل هذا الكم من العقد والتسلط والأنانية وانعدام الطموح..وهي ممكن ترتبط بشاب سوري عترة بيقطع 13 دولة مشي علي رجليه وسباحة وسط الحيتان وتسلق لأشجار الغابات عشان يوصل برلين وأول ما يوصل يبقي هيموت وعايز يشتغل..او شاب لبناني بيرطن 4 لغات ومؤمن بالمساواة في الحياة الزوجية..وتأهيله العلمي والنفسي بيخليه مطمع شركات بتقبضه بالاسترليني واليورو..ده لو قصرنا المقارنة علي العرب..لو مشينا شوية علي الخريطة وضميناك علي اخواتك الألمان..فصدقني لو عرفت رأي بعض المصريات اللي ارتبطن برجال ألمان..لازم تحس أنك في القاع الأسفل من الجحيم البشري..لأ القاع كبير شوية والله..

أنت مش أملة والله..ولا مطمع لأي تاء تأنيث في الكوكب..اتحمق أوي في مهاجمة أي شخص يدافع عن حقوق المرأة وقول عليه فيمنست وتقل أوي علي حرف السين واتشنج وكأن الأمر سُبة..املًا الفضاءات الافتراضية بحديث عن اللبنانيات لأنك مش هتطولهم..عن السوريات لأنك برضه مش هتطولهم..حك في الكومنتات علي بيدجات اندرلخت وروما طمعًا في لايك من شقراء بعيون زرقاء لأن السما السابعة أقرب لك منها..عيش في أوهامك بس هتلف تلف..ومحدش هيقبلك علي مضض غير مصرية تشيل قرفك وتحاول تصلح فيك ما أفسده الأهل.

وفي الختام سلام

‫#‏الذكر_المصري_في_بورصة_الرجال‬
‫#‏السوريات_يا_جماعة‬
‫#‏بيقولك_لبنان_فيها_ثورة_نستني_شوية_بقي‬

https://www.facebook.com/permalink.php?story_fbid=1481285705529286&id=100009436133419

انتقل إلى أعلى