مدونة أسود و أبيض

تجميع لمحاولات تفّكر
اللى فاكر جهله بأمرا ما يشفع ليه،
ده تناسى ان اقرأ اول كلمة نزلت على نبيه
لا يوجد حقوق ملكية، انسخ ما تشاء
لو التفكير مكنش عبادة يبقي ايه لازم الغيب
لولا إن التفسير إتطور كان زمانها خلاص مش آيه
يسقيك ولا يرويك
لقيت الناتج صفر، اسف لو ضيعت وقتك

 

تصنيفات

الهدف السؤال وليس الاجاية
اسعي، و علّم عشرة
قادر ، والدليل ان الحياة مهزمتكش
من وانت بتحبي وهي بتحاول متقومكش

الدنيا مبتديكش اللي انت شايفه عليك كتير 
ما دام هتحلم .. اوعى تحلم الا حلم كبير 
في ناس وصولها راح هدر عشان لحظة تأخير 
سابق بشراسة … كإنك بادئ الأخير

عاندي فينا أكتر … لسه فينا حيل نعاندك
تيجي فينا ايه يا دنيا … ورينا اللي عندك
اقفي بيننا وبين هدفنا ، وأخريلنا ساعتك
هنوصل في الميعاد ، ونحتفل داخل ملاعبك

 

عن صناعة الكتب واهلها

اربع بوستات لعمر طاهر

١

أرجوك لو أنت خلاص مش قادر تقاوم الكتب المزورة و زبون ثابت و مافيش فايدة .. لما تيجى تبرر ده اختار أى حجة غير إن الكتب الأصلية غالية .. شوف حجة تحافظ على برستيجك بعيد عن منطق نشالين الاتوبيسات.
قول مثلا : أصل الكتب الأصلية مابتوصلش عندنا فى البلد ؟ أصل انا ماعرفش الفرق بين المزور و الأصلى. انا ماعرفش أن المكتبة دى شغالة فى المزور .. نقى حججك مايبقاش خراب ديار و مخ مافرقتش فيه القراية بربع جنيه .. و هتفرق فيه ازاى أصلا صحيح وهى قراية حرام؟!

٢

توضيح و رد على بعض التعليقات على البوست ده

أولا
الكاتب المفروض يفرح جدا انه بيتقرى بأى شكل مضروب أصلى بى دى إف فوتوكوبى .. يسعده إنه واصل للناس بأى طريقة.
بس بالنسبة لى دى نظرة أنانية جدا من الكاتب إنه يكون مشغول بنفسه بس و يتجاهل خسائر شركاء تانين من مصمم الاغلفة لعامل فى مطبعة.

الحاجة التانية الكاتب بياخد أقل نسبة من مكسب الكتاب ما بين 10 ل 15 فى المية .. و الباقى بيصرف على دار نشر ب موظفيها. . مطبعة بعمالها. . مكتبة باللى واقفين فيها .. ب فواتير كهرباء و جمارك ورق و حبر و عمال توصيل و ليسته طويلة.
ف ماحدش يعتقد إن الكاتب زعلان علشان مكسبه هو لأنه زيه زى خمسين واحد مشاركينه المكسب.

ثالثا أنا مش ب ازعق غير ل اللى ب يبرر شراء المضروب ب أن الكتب غالية .. لأن كل حاجة حواليا غالية و ده مش مبرر للنشل أو السرقة. . ف بانصح أى حد أنه هو حر بس يقول سبب تانى علشان صورته.

رابعا تقريبا انا الكاتب الوحيد اللى عمل فكرة الطبعة الشعبية فى كتابين أثر النبى و طريق التوابل و الاتنين اتضربوا برضة و المزور اللى عليه ختم الطبعة الشعبية لسه ف السوق ..
مش بس كدة
كتاب أثر النبى أرباحه موجهة ل بنك الطعام و ده مكتوب عليه
و مع ذلك اتزور و الناس اشترته .. يعنى سرقوا فلوس طالعه ل الله .. أو ب البلدى أكلوا مال النبى.

خامسا دى حاجة مستفزة و محبطة جدا إنك تشوف تعبك مسروق و برضة مش للكاتب بس. . ده لصناعة كاملة ب تجيب كل يوم ضلف ناشر أو مكتبة .

دى قضية أكبر من مجرد كاتب مشغول بمصدر دخله .. أرجو الناس تتفهم ده و ماحدش يزعل .. علشان آخر أمل فى القضية دى هم القراء .. لا حكومة و لا داخلية ولا وزارة ثقافة و لا اتحاد ناشرين.

٣

للحق برضه لازم نقول إن الناشرين سبب فى انتشار موضة التنظير و تبرير شرا الكتب المزورة و انك تدافع عن ضرر الكتاب “المزور” فى جروب اسمه نادى القراء “الأصليين” و مش عارف قارئ أصلى بكتاب مضروب ازاى؟ .

المهم

الناشرين سبب

مش علشان الكتب الأصلية الغالية .. و بالمناسبة الكتب الأصلية هترخص لما الناشر يبقى شغال فى سوق آمن .. ف يبقى عارف يتجنب الخسارة اللى بتجى له من أول طبعة.

شغال فى سوق أمن ف يطبع بدل 1000 نسخة 10000 ف السعر يقل .. لكن يطبع 1000 يرجع له 800 و المزور ب يشحن كتب ب الكونتينر ؟

وحل الطبعة الشعبية انا جربته و لوحدى ماحدش عمل كدة تانى لأن الطبعة الشعبية اتضربت.

لكن الناشرين المصريين سبب
لأنهم أكسل من المزور

المزور بيلف مصر كلها حرفيا
بيعمل معرض كل أسبوع فى جامعة و مر شباب و نادى و جمعية شبان مسلمين و كنائس و قصور ثقافة

ب يستغل أن المسئولين فى الأماكن الحكومية دى مايعرفوش الفرق
و بيفرحوا بحد عارض كتب عندهم
و بيفخروا ب ده طبعا
بس الحقيقة انهم مضحوك عليهم من حرامية.

كام ناشر أصلى عمل معرض برة المعارض الرسمية ؟

مين عمل معرض فى المنزلة مثلا ؟
كان عندى ندوة هناك و وقعت اكتر من 100 كتاب مزور بابتسامة ل اللى جى التوقيع متحمس علشان مافيش كاتب زاره ولا شاف ندوة من أيام سيد حجاب 2004 ولا حد راح له بكتب غير المزور

مين من الناشرين الأصليين راح سوهاج أسوان دمياط بنها حوش عيسى المحلة الفشن و غيرهم

المزور فارش هناك ليل نهار و انت هنا فى مكتبك

لو الناشرين المصريين عندهم معرض كل أسبوع فى مدينة مصرية مش هيبقى فيه تزوير .. و الصناعة اللى ب تحتضر هتنتعش. . و الخصومات هتخلى الكتاب الأصلى أرخص

حاجة تانية السبب فيهابعض الناشرين
اللى ملوا السوق كتابات زى وشهم
كتابات خلت الناس أولا تاخد مقالب فى كتب اصلية لا ليها طعم ولا معنى كعت فيها ع الفاضى .. ف بقت تقلل احتمالات الخسارة ب شراء المضروب.

و ثانيا ب نشر كتابات عوجت مخ اللى لسه دماغهم خضرا و خلتنا نلبس نماذج ما يعلم بيها إلا ربنا.

انا قلت كل اللى عندى و عمال اخبط فى قراء و ناشرين و زملاء آخر مياصة ف معلش يعنى لو منفعل شوية .. بس من قلبى بجد اللى عايز يزعل يزعل

٤

مساء الفل ..ماجاش فى بالى إن بوست صغير كدة هيقوم خناقة بقالها يومين شغالة.
الجزء المفيد أن الموضوع اتفتح بقوة المرة دى.

طيب فيه ناس بتشتمك و هتخسر قراء!
طبيعى لما الكاتب يكون عارف إن فيه 100 ولا 200 واحد متابعينه و بيقروا له يحافظ عليهم و مايزعلهمش بكلام يصدمهم .. ده صحيح
بس أنا مش باشتغل خفير على القراء
أنا احتراما للقراء .. باشتغل خفير على الأفكار اللى أنا مقتنع بيها.

طيب عندك حق بس أسلوبك كان عنيف!
طيب وهى اللطافة نفعت فى إيه و أنا ب اتكلم فى الموضوع ده بقالى 7 سنين؟
هل اللطافة ساعدت كتاب أصحابنا موهوبين ماحيلتهمش حاجة غير الكتابة إنهم يتوقفوا عن كتابة روايات و بيعها لكتاب من المغرب و لبنان ب 300 دولار؟
هل اللطافة منعت مزور إنه يتصل ب دار الكرمة و يبهدلهم علشان نزلوا رواية د.أحمد خالد توفيق آخر يوم فى رمضان .. يعنى العمال فى إجازة يعنى مافيش مطابع تضرب الكتاب غير بعد أسبوع العيد . يعنى الناس هتشترى الأصلى يعنى يشتم بتوع دار النشر و يقولهم ببجاحة خربتوا بيتى؟
هل اللطافة ساعدت كاتب موهوب واخد جوايز إنه يعيش حياة طبيعية يكتب و يكسب فلوس يتعلم بيها و يقرا و يطور نفسه و مايطلعش فى حلقات وصفوا لى الصبر يقول أنا ماممسكتش 500 جنيه على بعضها من كتبى؟
هل اللطافة ساعدت إن اللى عايز ينشر حاجة يستلف و يبيع دهب و يلم 10 آلاف جنيه يروح بيها للناشر و يدفعهم علشان الناشر عارف إنه مش هيبيع و المزور واكل السوق و بيشيل الكاتب مصاريف حلمه اللى نفسه يحققه؟
هل اللطافة ساعدت مكتبة الشروق إنها ماتقفلش فرعين من خمسة، أو ساعدت مكتبة ألف إنها ماتقفلش 30 فرع من 40؟
هل اللطافة منعت المزورين إنهم يشحنوا كتب مضروبة برة مصر ب الكونتينر لحد ما بقت البلد متعلم عليها برة و جوة و دور النشر العالمية بتبعت تهدد تلجأ للقضاء و تفرض عليك غرامات؟
هل اللطافة عطلت أن الواحد يقف جنب د.أحمد خالد توفيق فى حرم كلية طب طنطا اللى هى بيته نتفرج فى معرض الكتاب على جناح كتب د.أحمد اللى كلها مزورة و شعور الراجل بالقهرة؟
هل اللطافة منعت ظهور شركات أون لاين مؤخرا بتبيع الكتب المضروبة و تقولك هاى كوبى؟
هل اللطافة خلت يبقى فيه إصدارات غير فى موسم معرض الكتاب؟

لازم تراعى ظروف القارىء المادية!
و أنا مش باعمل غير كدة و اللى فى الوسط عارفين
الكاتب الوحيد اللى نفذ فكرة الطبعة الشعبية فى كتابين أثر النبى و طريق التوابل.
وكتبى هى الأرخص فى أى مكتبة و ممكن تسأل .. و ده دايما طلبى من الناشر.
وكل كتاب لازم يتعمل إيداع لنسخ فى مكتبة مصر العامة و مرة نشرت هنا تقرير بأرقام مرات الاستعارة لكل عنوان و كنت باعتبره أهم جايزة حصلت عليها.
حتى مقالاتى باحطها هنا بوست مش لينك علشان الباقة
و باروح للقراء لحد بيوتهم فى كل مدن مصر و الكل عارف و ماحدش تانى بيعمل كدة.
لكن فيه ناس مصرة إنى كتبت دفاعا عن المبيعات، و زنقت هى الموضوع فى الحتة دى ..
ولو أنت مصر تحصره فى كاتب بيدافع عن أكل عيشه و رزقه بس، يبقى أنت مصر تحصر الموضوع فى ضحية و حرامى، أنت اللى اخترت تبقى نشال و ده اللى مزعلك.

أنا باتخانق بخصوص مهنة و شغلانة فى بلد ماحدش من كتابها اختبر حياة الكاتب الطبيعية اللى تحافظ على كرامته.
خناقة على مصيبة اسمها حقوق الملكية الفكرية (قعدت سنة و نص اترجم ف رواية باولو كويلو بعد ما اخدت اذنه و فى الطبغة التالته اتصل الناشر اللبنانى و قال اشتريتها، فرميت تعبى على جنب و ماتطبعتش تانى)

سيبك من الكُتاب اللى قلعوا البنطلون و نزلوا الخناقة دى بالبوكسرات و بيقولوا لك أحنا مع حق المعرفة و أنا مش هازعل لو كتابى اتزور و أنا موافق على ضرب كتبى وخدونى معاكم
لأن كل واحد من دول عنده شغلانة تانية، وهم مخرج و كاتب إعلانات و موظف فى وزارة الثقافة و صحفى فى مؤسسة كبيرة
فماتتخدعش و تصدق ناس نازلة تمثل و تصطاد قراء فى الزحمة.

ماهجمتش ليه دور النشر؟
طول الوقت باهاجمهم و قلت انهم اكسل من المزور و فيهم كتير ياما لبسوا الناس فى أسعار كتب مالهاش لزمة لما الناس اتعقدت و بقت تقلل احتمالات الفلوس اللى هتترمى فى الارض ب شراء المزور.

طيب أنت حملت على القارىء و هو الحلقة الأضعف!
ده كلام مش صحيح القارىء هو الحلقة الأقوى حاليا
هو اللى حاطط ايده بشكل مباشر فى ايد واحد حرامى هيخلص على الشغلانة و اللى شغالينها
أقل ضبطية و أرجع للأخبار لما بيدخلوا مكان فيه مكن تزوير بيقولك عثروا على مليون نسخة .. يعنى حوالى 40 مليون جنيه أنت هاديت بيهم حرامى
إحنا ك كتاب واقفين بنتضرب على قفانا .. و أنت – بدعمك للمزور- السبب فى التلطيش اللى شايفينه؟.
و سبب إن كتاب كتير مش عارفين ياخدوا حقوقهم من دور نشر ( أصل المضروب مالى السوق معلش يا فنان).
و مش مساعد إن كاتب يحط شروط و طلبات يحافظ بيها على شغله ( يا عم كويس إننا هننشرلك ما السوق كله فى المزور).
أنت كقارىء بدعمك للمزور خليت كتاب كتير مايعرفوش ينشروا غير لو دفعوا و ده المفروض مايحصلش.
هتقول لى بتهاجم القارىء و هو عنده مصاريف و التزامات و عيال عايز يربيها. طيب عامل المطبعة و بياع المكتبة و تاجر الورق و الناشر و الكاتب اللى سايب عياله و قافل على نفسه بيحزق و 20 واحد تانى برضة عندهم مصاريف و عيال عايزين نربيها.

طب ماتزعقش للناس و قول حل..
الحل إنك تتوقف عن شراء المزور
ساعد الصناعة تقف على رجلها ..
و حط شروطك.
أضغط فى طلب النسخة الشعبية
أعمل حملات مقاطعة لكتاب أنت شايف سعره مبالغ فيه
أضغط علشان دور النشر تجى لك لحد عندك زى ما المزور عامل عندك معرض كل اسبوع
أضغط على دور النشر يبقى عندها عروض كل شهر
غلّس على اللى عايشين من خيرك و ده حقك.

طيب ايه اللى اكتشتفته فى اليومين اللى فاتوا؟
الهبد يحكم.

أرجوك لو أنت خلاص مش قادر تقاوم الكتب المزورة و زبون ثابت و مافيش فايدة .. لما تيجى تبرر ده اختار أى حجة غير إن الكتب…

Posted by Omer Taher on Thursday, October 17, 2019

توضيح و رد على بعض التعليقات على البوست دهأولا الكاتب المفروض يفرح جدا انه بيتقرى بأى شكل مضروب أصلى بى دى إف…

Posted by Omer Taher on Friday, October 18, 2019

للحق برضه لازم نقول إن الناشرين سبب فى انتشار موضة التنظير و تبرير شرا الكتب المزورة و انك تدافع عن ضرر الكتاب "المزور"…

Posted by Omer Taher on Friday, October 18, 2019

مساء الفل ..ماجاش فى بالى إن بوست صغير كدة هيقوم خناقة بقالها يومين شغالة.الجزء المفيد أن الموضوع اتفتح بقوة المرة…

Posted by Omer Taher on Saturday, October 19, 2019

 

انتقل إلى أعلى