مدونة كريم سمارة

عن المقارنة

أحمد جرى 5 كيلو في 25 دقيقة، مصطفى جرى 5 كيلو في 35 دقيقة
مين أسرع وأقوى وأفضل بدنيا؟
أحمد طبعًا!
برافو ..
أحمد جرى الـ 5 كيلو داخل استاد وعلى نجيلة وأرض مجهّزة
مصطفى جرى الـ 5 كيلو على الشاطئ على أرض رملية
مين أسرع وأقوى وأفضل بدنيًا؟
ممم .. جايز الإتنين متعادلين
طيب .. أحمد عنده 23 سنة
مصطفى عنده 45 سنة
مين أسرع وأقوى وأفضل بدنيًا؟
مصطفى
طيب .. أحمد وزنه 73 كيلو
مصطفى وزنه 85 كيلو
أحمد معافى .. مصطفى عنده رباط صليبي
أحمد دي عاشر مرة يجرب يجري المسافة دي
مصطفى أول مرة ..
وهكذا
كل ما نعرف عن مصطفى أكتر .. كل ما هنديله كريديت أكتر
إيه رأيك فينا لما حكمنا بأفضلية أحمد على مصطفى من أول سؤال فوق؟
كنا أغبيا وسطحيين .. صح؟
كذلك هو نفس الغباء والسطحية لما تقارن نفسك بأي حد
كل واحد بيئته مختلفة والفرص اللي بتقابله في الحياة مختلفة .. وأسرته مختلفة
وقدره مختلف .. مينفعش تحكم على نفسك إنك متأخر عشان حد في سنك سبقك
ممكن تكون إنت اللي سابق بحسب المعطيات اللي في حياتك .. وهو الللي متأخر
متحكمش على نفسك بإنك فاشل عشان غيرك جاب مجموع أعلى أو اتوظف في وظيفة أحسن أو إشترى عربية واتجوز وبينزل صوره في المصيف وإنت لسه بتقول يا هادي
ممكن والله إنت اللي سابقه بكتير ..
واحد طلع على الدنيا يتيم وهو المسؤول الأول عن أسرته واتجوز على سن 30
أنجح مليون مرة من واحد طلع على الدنيا في ظل والده الميسور واتزوج وهو عنده 25 سنة
واحد اتخرج من جامعة مصرية وهو بيصرف على نفسه أنجح بكتير من واحد درس في هارفارد عشان ‘خالو’ اللي في أمريكا سفّره يكمل دراسته هناك
أسوء فكرة وأبشع جريمة ممكن تعملها في حق نفسك إنك تقيس نجاحك في الحياة بعقد مقارنات بينك وبين اللي حواليك
المقارنة الوحيدة العادلة اللي تعملها مع نفسك .. إنك تقارن نفسك دلوقتي .. بنفسك من فترة
من إسبوع .. من شهر .. من سنة
دلوقتي أحسن؟ يبقى إنت ماشي صح .. دي المقارنة الوحيدة العادلة
والمقارنة الوحيدة اللي تضمنلك حياة سعيدة ونفسية متزنة
في ناس كتير سابقة ومش حاسة إنها سابقة .. بسبب المقارنات العقيمة اللي بتعقدها بينها وبين نفسها وتحكم على نفسها بالفشل .. لمجرد إنها جرت 5 كيلو في 35 دقيقة وأحمد ما شاء الله عليه وصل في 25

https://www.facebook.com/saleh.zero/posts/2378750042140610

انتقل إلى أعلى