مدونة أسود و أبيض

تجميع لمحاولات تفّكر
اللى فاكر جهله بأمرا ما يشفع ليه،
ده تناسى ان اقرأ اول كلمة نزلت على نبيه
لا يوجد حقوق ملكية، انسخ ما تشاء
لو التفكير مكنش عبادة يبقي ايه لازم الغيب
لولا إن التفسير إتطور كان زمانها خلاص مش آيه
يسقيك ولا يرويك
لقيت الناتج صفر، اسف لو ضيعت وقتك

 

تصنيفات

الهدف السؤال وليس الاجاية
اسعي، و علّم عشرة
قادر ، والدليل ان الحياة مهزمتكش
من وانت بتحبي وهي بتحاول متقومكش

الدنيا مبتديكش اللي انت شايفه عليك كتير 
ما دام هتحلم .. اوعى تحلم الا حلم كبير 
في ناس وصولها راح هدر عشان لحظة تأخير 
سابق بشراسة … كإنك بادئ الأخير

عاندي فينا أكتر … لسه فينا حيل نعاندك
تيجي فينا ايه يا دنيا … ورينا اللي عندك
اقفي بيننا وبين هدفنا ، وأخريلنا ساعتك
هنوصل في الميعاد ، ونحتفل داخل ملاعبك

 

كله بيزنس سواء الحفلات أو الحج و العمرة

السعودية بقت بتتجه مؤخراً بعد الانفتاح إلى انها تكون دولة سياحية جزء من دخلها مبني على السياحة مش بس البترول زي الامارات .. و ده خلاها عملت تأشيرة سياحية جديدة بيتم استخراجها الكترونياً و لها بعض الشروط, أهمها انها تكون لغرض ترفيهي واضح (زي مثلاً حفلة بيونسيه و حفلة نيكي ميناج اللي كانت من أسبوع بس اتلغت بسبب اعتذارها عن دخول المملكة لأسباب سياسية و لاعتراضها على دعمها للعنصرية, و زي حفلة فريق سوبر جونيور الكوري امبارح) و لمكان مصرح له بإقامة حفلات ترفيهية, و انها يتم استخراجها لعدد 4 أفراد على الأقل..و لا يصرح لحاملها بالحج و العمرة إلا بتغيير التأشيرة لتأشيرة حج و عمرة.. سعر التأشيرة 50 ريال و يتم استخراجها خلال دقائق و يسمح بدخول النساء بدون محرم شرط أن تكون السيدة فوق سن 30 سنة .. و مدة التأشيرة 30 يوم

الدول المصرح باستخراج التأشيرات السياحية منها هي دول الشنجن و الأمريكتين و اليابان و الصين و سنغافورة و ماليزيا و بروناي و أستراليا و كوريا و جنوب أفريقيا فقط.
كل ده جميل جداً و مافيش فيه أي مشكلة لوحده كده, خاصة لو تغاضيت عن ان دي بالذات أراضي مقدسة, و على الأقل ممكن نحترم أهمها زي المدينة المنورة اللي اتعمل عليها حفل شرقي شارك فيه عاصي الحلاني و اليسا قريب, لكن في المجمل ده قرار عادي, دولة عادية قررت تعمل تأشيرة سياحة زي أي دولة في العالم, المشكلة هنا انك لما تقارنها بتأشيرة الحج و العمرة..تأشيرة العمرة للمصريين بتتكلف 2000 جنيه يعني ما يعادل 450 ريال سعودي يعني 10 أضعاف تأشيرة المرقعة, و استخراجها بياخد أيام, و بشروط كتيرة جداً و مدة محددة باليوم و لازم يكون لك مهنة واضحة و لازم استخراجها خلال مواسم العمرة في المملكة ..

اللي خلاني أدور شوية عن الموضوع ده هو انتشار تويتات على تويتر امبارح بإن الناس بدل ما يروحوا الحفلة راحوا يعملوا عمرة (بعض المسلمين من الدول دي) و كانوا سعداء بسهولة التجربة دي و بإن تأشيرة العمرة بقت لها طريقة أيسر و أسهل..اللي أكيد مش هتدوم لمدة طويلة..لأن المملكة بتعتبر الحج والعمرة مصدر دخل مهم و بتكرس جهود أمنية كبيرة لمراقبته, على سبيل المثال أنا لما كنت في الحج بنفسي سنة 2014 و كنت من حجاج الداخل السعودي و تصريح الحج كان بحوالي 1000 ريال..الباص بتاعنا اتفتش للتأكد من تصاريح الدخول, و بعد تفتيشه تم تشميعه بشمع أحمر زي المساجين من بعد منطقة الميقات لحين دخول مكة لضمان عدم وجود متسللين..و بيتم تفتيشك أثناء الحج و مراجعة أوراقك و لو اتقفشت بيتم أخذ بصمتك و تغريمك و منعك من دخول المملكة 10 سنوات و هتخسر مصدر رزقك..و لو انت سعودي بتتسجن..السنة اللي بعدها عرفت ان صاحب شركة العمرة السوري اتسجن بسبب تهريبه حجاج و تم تغريمه مليون ريال سعودي و دا رقم مرعب..قبل الاجراءات دي كان أمير منطقة مكة خالد الفيصل بيعمل اجراءات منع أذكى, زي عدم وجود أي تنقلات داخل مكة وقت الحج لغير الشركات..فلو عرفت تدخل قضي حجتك على رجليك بقى مئات الكيلومترات

و الحقيقة رغم ان العالم كل يوم بقى مكان أسوأ و أقذر .. الا ان ظهور حقائق الأشياء شئ جيد..و ظهور النوايا واضحة كل يوم رغم خباثتها أفضل كتير من الاختباء الرخيص..مافيهاش حاجة اننا نكون واضحين في ان الحرمين الشريفين تحت ايدين مستثمرين بيعتبروهم مصدر دخل, بالايجار..كل حاجة بفلوسها .. و بيهدموا كل الآثار و مقابر الصحابة وبيوتهم بدم بارد و باسم فتاوى المخرفين و الحرامية علشان يبنوا فنادق و مولات تجارية تكبر السبوبة شوية .. و بياخدوا اتاوة على الحج و العمرة كما لم يفعلها كفار قريش من قبل..و ده شئ بخلاف كونه مخزي و سافل و ينسف مروءة أي انسان لو كان عنده بقايا من المروءة..الا انه كمان حرام شرعاً
و ان ده كله بيزنس..سواء الحفلات أو الحج و العمرة, الفرق ان البيزنس الجديد لسه صغير و مليان منافسين و مالناش فيه Market share لسه فمحتاج دعم و عروض و برومو كودز زي أوبر أول ما فتحت كده .. ممنوع تدخلي من غير محرم بتأشيرة العمرة لأننا دولة اتبنت على الاسلام و تكفير الناس و قتلهم و الاسلام ده متربي عندنا في البيت, بس ممكن تدخلي عادي لو داخلة ترقصي في حفلة..لأن الحج بيزنس حصري و خلاص شايل نفسه و زبونه موجود أياً كان السعر أو النوع و هييجي دايماً منه أعداد تفوق احتياج السوق
تم تأسيس هيئة للترفيه زي هيئة الأمر بالمعروف و النهي على المنكر اللي كانت بتمنع سواقة النساء و تنزل مطوّعين تراقب الكاشفات وجوههم و السافرات بس دورها اتحجم حالياً
الحقيقة القاسية دايماً أحسن و الله من الكذب اللطيف المعسول

هحط شوية مصادر في الكومنتات لموضوع التأشيرات ده و اللي ببساطة ممكن أي حد يلاقيهم بسهولة

السعودية بقت بتتجه مؤخراً بعد الانفتاح إلى انها تكون دولة سياحية جزء من دخلها مبني على السياحة مش بس البترول زي الامارات…

Posted by Loay Abobakr on Saturday, July 13, 2019

انتقل إلى أعلى