مدونة أسود و أبيض

تجميع لمحاولات تفّكر
اللى فاكر جهله بأمرا ما يشفع ليه،
ده تناسى ان اقرأ اول كلمة نزلت على نبيه
لا يوجد حقوق ملكية، انسخ ما تشاء
لو التفكير مكنش عبادة يبقي ايه لازم الغيب
لولا إن التفسير إتطور كان زمانها خلاص مش آيه
يسقيك ولا يرويك
لقيت الناتج صفر، اسف لو ضيعت وقتك

 

تصنيفات

الهدف السؤال وليس الاجاية
اسعي، و علّم عشرة
قادر ، والدليل ان الحياة مهزمتكش
من وانت بتحبي وهي بتحاول متقومكش

الدنيا مبتديكش اللي انت شايفه عليك كتير 
ما دام هتحلم .. اوعى تحلم الا حلم كبير 
في ناس وصولها راح هدر عشان لحظة تأخير 
سابق بشراسة … كإنك بادئ الأخير

عاندي فينا أكتر … لسه فينا حيل نعاندك
تيجي فينا ايه يا دنيا … ورينا اللي عندك
اقفي بيننا وبين هدفنا ، وأخريلنا ساعتك
هنوصل في الميعاد ، ونحتفل داخل ملاعبك

 

Mido

– ميدو تفتكر احنا عايشين ليه؟!

— والله يا باشا انا مصطبح طول اليوم فا مش مركز

– يعني تفتكر ان الحل في الاصطباحات يا ميدو؟!

— افتكر كده يا باشا

– طب طالما انت معاك الحل بتغليه عليا ليه يا ميدو؟!

— كل اللفة دي يا باشا علشان مستغلي الصباع؟!

– لا الكلام جاب بعضه مش اكتر

— طب حيث كده بقى الصباع ب ٥٠٠

– يعني الحوار اللي دار بيننا ده ما أثرش فيك

— بص يا باشا

– بصيت

— بص الصباع قد ايه؟!

– انا كنت فاكرك هتقولي حكمة او معلومة

— لا انا اتفه من كده

– طب مشيها ٤٠٠

— يا باشا انا بنسيك همومك عارف ده معناة ايه؟!

– ايه يا ميدو

— اني بنسيك همومك

– وايه الإضافة ف كده؟!

— لا انا بأكد المعلونة مش اكتر

– طب علشان المعلونة دي خليه ب ٤٠٠

— يعني يرضيك يا باشا أبقى بنطق الكلام غلط وكمان ينضحك عليا؟!

– ميدو انا بضعف قدام إقناعك وفلسفتك في الحياة فا متستغلش نقطة ضعفي ناحيتك

— طب علشان الكلمتين الحلوين دول الصباع ب ٥٠٠

– كسبنا ايه احنا كده؟!

— انا كسبت ٢٠٠ جنية في الصباع

– طب وانا كسبت ايه؟!

— مش لازم تكسب يا باشا انت جايلي علشان تنسى همومك وتُبقي الوضع على ما هو عليه تفصل يعني مش اكتر تفكيرك في مكسب دا كده يبقى طمع

– مش بقولك بضعف قدامك! هات الصباع

— هات الفلوس الاول

– انت مش واثق فيا؟!

— انا مبثقش ف نفسي

– للدرجة دي؟!

— اه مصطبح طول الوقت فبسقّط، اثق ازاي في واحد بيسقّط!

– طب ادي ال ٤٠٠ جنية اللي اتفقنا عليهم

— باقي كده ١٠٠ يا باشا

– اشمعنى مش مسقّط دلوقتي؟!

— بص يا باشا انا الحياة علمتني حكمة

– قولتلك بضعف قدام فلسفتك فا ما تدخليش من ثغراتي

— لا مانا مركزتش وهي بتعلمهالي فا متقلقش

– طب هات الصباع

— هات ال ١٠٠ جنية

– مش لما اجربها مش يمكن الاستافة متعجبنيش؟!

— وايه بيعجبنا ف الحياة يا باشا؟! ماحنا عايشين علشان نرضى باللي بيتحط قدامنا

– خلاص ارضى بال ٤٠٠ جنية

— بس دا ميمنعش اننا لو نقدر نقاوم المفروض نقاومه، ابرز ال ١٠٠ جنية

– انت بتفتح عليا مطوة يا ميدو؟!

— لا انا بقاوم المفروض يا باشا

– بنفس المنطق ممكن اقاومك انا كمان وممكن انا اكسب الصراع واخد الحشيش والفلوس

— لا كده يبقى الدنيا اتحولت لغابة يا باشا البقاء فيها للأقوى

– طب ماهي طول عمرها كده يا ميدو

— عندك حق يا باشا كانت تايهة عني معلش، انا حشيشي معايا وال ٤٠٠ جنية معايا ومعايا سلاح يعني أقوى منك مالكش عندي فلوس

– انا اسف

— يبقى اتعلمت الدرس يا باشا مع ان الفلوس اللي معايا دي بتاعتك، حقك يعني، بس علشان انا الأقوى لازم تتحايل علشان تاخده واشيلك جميلة كمان اني اديتك حقك

– فهمت يا ميدو، وادي ال ١٠٠ جنية الباقية.. هات الصباع

— ناقص حاجة لازم تتعلمها يا باشا

– ايه؟!

— انك طالما جبت ورا وبقيت تاخد حقك كأنه جميلة هيجي يوم واللي بيديك الحق بتاعك ده يطمع فيه ويستخسره فيك ومش هيديهولك طالما ما خوفتهوش من الاول وحسسته ان ده حقك ومش هتفرط فيه

– يعني ايه يا ميدو

*بيركب المكنة وياخد الفلوس والحشيش ويجري*

– يا ميدو؟! يا ميدو؟!

https://www.facebook.com/wageeh.sabry/posts/2515776458464122

انتقل إلى أعلى