تجميع لمحاولات تفّكر
اللى فاكر جهله بأمرا ما يشفع ليه،
ده تناسى ان اقرأ اول كلمة نزلت على نبيه
لا يوجد حقوق ملكية، انسخ ما تشاء
لو التفكير مكنش عبادة يبقي ايه لازم الغيب
لولا إن التفسير إتطور كان زمانها خلاص مش آيه
يسقيك ولا يرويك
لقيت الناتج صفر، اسف لو ضيعت وقتك

 

تصنيفات

الهدف السؤال وليس الاجاية
اسعي، و علّم عشرة
قادر ، والدليل ان الحياة مهزمتكش
من وانت بتحبي وهي بتحاول متقومكش

الدنيا مبتديكش اللي انت شايفه عليك كتير 
ما دام هتحلم .. اوعى تحلم الا حلم كبير 
في ناس وصولها راح هدر عشان لحظة تأخير 
سابق بشراسة … كإنك بادئ الأخير

عاندي فينا أكتر … لسه فينا حيل نعاندك
تيجي فينا ايه يا دنيا … ورينا اللي عندك
اقفي بيننا وبين هدفنا ، وأخريلنا ساعتك
هنوصل في الميعاد ، ونحتفل داخل ملاعبك

 

Planet Based Diet Group

ترددت كثيراً قبل ان أكتب هذا البوست*بصوت جمال عبد الناصر*.

الفكره إن الكلام اللي أنا عايز أقوله فيه ألف طريقه يساء بيها فهمه..وأنا إتعودت إن القانون بيقول إن لو البوست ممكن يتفهم بعشر طرق صح وبطريقه واحده غلط، معظم الناس هتختار تفهمه بالطريقة الغلط!..عشان إحنا بنفضل نعلم على الناس على إننا نفترض فيهم حسن النية.

بس ما علينا من التنويهات بقى ومن الناس دي، أنا الكلام ده كاتمه في قلبي بقى لي كتير.

من سنة كتبت على طريقة الأكل اللي غيرت حياتي، وحسيت إن الموضوع لازم يوصل للناس، وفعلا كان فيه إستجابه كبيره والناس إقترحت نعمل جروب لنظام الأكل، فعملت الجروب وتطوعت بإني أكتب كل المعلومات اللي أعرفها فيه..وبعد شوية الجروب كبر مني قوي وبقى مستحيل أسيطر عليه لوحدي..فناس من الجروب اللي فهموا النظام كويس تطوعوا وبقوا آدمينز، ودي حاجه بيعملوها من وقتهم ومجهودهم بدون مقابل لقناعتهم بالفكره وتأثيرها على حياتهم.

لحد هنا القصة جميلة قوي وكل الناس حلوه، وفيه وئام وإبتسام وسهام وكل حاجه.

لو حد فيكم شاف فيلم إسمه Dogville هيفهم الفقرة اللي جايه دي وهي عن الشعور بالإستحقاق..وإزاي “شكرا على المساعده الجميله والمجهود الرائع” بتتحول بسرعه جداً إلى “أنت كنت فين لما بعت لك رساله الساعة 6 الصبح ورديت عليا بعدها بساعتين كاملين؟؟؟…أنت فاكر نفسك مين؟!!”.

مابيعديش يوم عليا من غير رسالتين تلاته من نوعية “الجروب بتاعك اللي بقى ميغة، إيه التسيب والقرف ده؟؟..ده فيه ناس سخيفه جداً بيدخلوا يهزروا وحاجه في منتهى البواخه..أنا حزين/حزينة على اللي الموضوع وصل له بعد ما كنت بقدركم وبحترمكم!!”.

ولما أرد معتذرا إن الجروب فيه ربع مليون شخص وإن الناس كلها اللي بتشرف عليه متطوعين ومش في مقدورهم يعملوا أكتر من كده (بالرغم إن فيه منهم والله لو بياخد فلوس ما هيشتغل في الجروب بالحماس والضمير ده) فساعات هيفلت مننا تعليق واحد شتم أو واحد قال معلومه غلط…فتلاقي الرد بييجي بمنتهى الإشمئزاز “لو مش قد جروبات بتعملوها ليه؟”.

دي نوعيه من البشر.

فيه نوعية تانية ودول كتير..اللي هو داخل يهيص..لاهو عايز يبقى نباتي ولا صحي ولا مهتم، هو رايح مع الزحمه..ويدخل يحط صور كوميكس ويتريق على كرشه وعلى الدايت ويكتب بوستات من نوع “صباحكم جرجير” و”ليلتكم خرشوف” والحاجات دي..فالنوع الأولاني يقفش جداً من التسيب اللي حاصل في الجروب، ومش يطلب باللطافه كده إننا نعمل حاجه..لأ..يدخل يدينا خطبه عصماء عن التسيب والإهمال وإننا مش شايفين شغلنا..بنفس إستحقاق واحد دافع عشرين ألف جنيه في العملية دي وإحنا أكلنا عليه فلوسه!…ده تسيب..ده إهمال..ده مابقاش جروب!!

فنعتذر ونعمل تصويت على قوانين في الجروب إننا هنمسح البوستات المخالفه واللي مالهاش لازمه عشان نحافظ على الجروب كمكان مفيد للي عايز، مش سويقه زي ما إحنا كمصريين بنحب نقلب اي حاجه فيها زحمه…زي ما معرض الكتاب 90% من اللي فيه مش رايحين يشتروا كتب..الجروب النبالتي 90% من اللي فيه جايين يتفرجوا…وده كويس في حد ذاته، أهه هيتخبط بمعلومه طائشه كده ولا كده يمكن تنفعه..زي ما يمكن يغلط ويشتري كتاب يقراه من المعرض!

فييجي نوع تالت بقى، وهو نوعية الثائر بلا قضية..ودول اللي على طول متضايقين من تعسف “القيادات” كأننا بندير دولة مش جروب بتاع أكل نباتي..فتلاقي حد كاتب بوست مليء بالنضال عن تعسف آدمن الجروب النباتي والغبن الذي تعرض له العضو أو صديق العضو في مسح بوسته المبجل.. اللي كان فيه معلومه غلط مش في النظام أو spam بيملى الجروب هزار ونكت لغاية ما هيقلب جروب “قفشات نباتية” مش حاجه تعرف تطلع منها معلومات.

فنقول..يا جماعه إحنا إتفقنا وعملنا تصويت وقلنا هنعمل كده عشان نحافظ على الجروب وده أصلا كان طلب أعضاء الجروب نفسهم وصوتوا عليه بأغلبيه ساحقه!! (أهه..ديمقراطية ولا مش ديمقراطية دي يا متعلمين؟)

“طاب يا أخي حذرني قبل ما تمسح البوست بتاعي بالطريقه البشعه دي”…دي جمله تحسسك إنك قتلت طفل من أطفاله، أو بترت له عضو، مش مسحت بوست كان بيتكلم فيه عن إن إزاي الفشه والكرشه الضاني واحشينه.

فتتكلم معاه بالمنطق..حضرتك إحنا ربع مليون واحد ما شاء الله…وبنمسح يوميا عشرات البوستات المخالفه..لو إفترضنا إني هحذرك الأول مره، وبعدين لو غلطت تاني ساعتها بس ابقى أمسح البوست..مافيش طريقه أعرف بيها أنا حذرت مين…ده حكم الماتش بيشيل ورقه يسجل فيها إنذارات 22 لاعيب عشان ماينساش..إحنا هنسجل بقى إزاي تحذيرات ربع مليون شخص…هل يعقل إني مثلا أعمل excel شيت أسجل فيها الناس اللي حذرتهم وكل مره أشوف بوست مخالف أدخل أشوف في وسط آلاف الأسماء إذا كان الشخص ده أول مخالفه له ولا تاني واحده ولو طلعت تاني واحده ساعتها بس أمسح البوست؟…هل ده منطقي؟

فتلاقي الرد “آه عادي…ولو مش قد الجروبات ماتعملوهاش!”..وتلاقي الكلام أخد منحنى بتاع مدير في شركة مالتي ناشيونال بيمسح بيك الأرض على تقاعسك وبيقول لك إن مافيش bonus السنه دي وإنك على غلطه ويمشوك!!

بلاش.

الجروب كل المعلومات اللي الناس محتاجاها عن النظام، ملمومه في بوست قعدت أنا والناس اللي في الجروب نكتب فيه شهور فعلا!!…كله متجمع بشكل سهل في بوست واحد فيه لينكات..لينك يشرح النظام..لينك فيه وصفات أكل..لينك عن فوايد حاجه أو أضرار حاجه..وهكذا..

يوميا بقى بيجي لي رسائل كتير محتواها “أنا مش فاهم النظام بتاعكوا ده..ممكن تشرحهولي”…فأقوم باعت للشخص اللينك وأطلب منه يقراه وهيلاقي كل اللي هو عايزه فيه ولو لسه فيه حاجه مش فاهمها أنا تحت أمره.

تلاقي الرد..”طاب ماتقول لي يا عم يعني..أعمل إيه من الآخر؟؟”

يا سيدي ماهو أعمل إيه من الآخر دي هو ده اللي مكتوب في البوست اللي أنا بعته لحضرتك.
“وأنا لسه هقرا كل ده..ما تختصر لي كده؟”.

دي أصلا أكتر نوعيه موجوده…اللي هو تبعت له فيديو يشوفه..يقول لك ..لأ طويل..إحكي لي اللي فيه كده..على أساس إن ماعندوش 5 دقايق يضيعهم لأنه بيدير الكون في بقية وقته..وبعدين لو إنت هتضيع ساعتين تكتب فيهم كل حاجه من أول وجديد تعرفها عن الدايت عشان هو يوفر خمس دقايق من وقته..فهو شايف إن ده أقل حق من حقوقه..ده واجب عليك يا أخي..ولا أنت بس عامل فيها بتساعد الناس وانت لا بتساعد ولا حاجه؟!!!

خلي دول على جنب بقى…وشوف نوعيات بقى تانيه..زي أعداء المنطق.

تلاقي رساله غاضبه من واحد “أنت إيه اللي أنت بتقوله ده؟..أنت بتضلل الناس..أنت ممكن حد يفهم اللي أنت بتقوله ده غلط ويقوم مبطل أكل خالص ويموت”…أيوه..بس إحنا عمرنا ما قولنا كده في الجروب!!…”أنا عارف..بس برضه..ممكن حد يعمل كده..ماهو الناس مش كلها إستيعابها زي بعض!!”…طاب حضرتك أنا ساعتها هيبقى مال أمي؟…يعني لو أنا قولت لك خلي بالك وأنت بتعدي الشارع..أنت عديت الشارع وأنت مغمض عينيك فعربية هرستك..ده إزاي ذنبي؟!!

وخد عندك بقى “الجالية الإسلامية” في مصر..بيتعاملوا معاك من منطق..إيه الكفر اللي أنت بتقوله ده؟…اللحمه حلال..كيف تحرمها؟

يا جماعه أنا عمري ما قولت إنها حرام..أنا بقول إن تركها مفيد للصحه.

“ماهي لو مضره ماكانش ربنا حللها يا فاسق”
طاب يا جماعه ماهو الليه والمفتقة والسكلانس حلال ومافيش دكتور على وجه الأرض هينصحك بأكلهم..إشمعنى دول مش كفرة؟

“هه؟…إإإإ…مش عارف..يا كافر”.

طبعا للأمانه الشديده..ده بيحصل وسط سيل من رسائل الشكرانية والعرفان والإطراء اللي أنا ماستاهلش نصهم، وفيه ناس بتعاملني على إني باستير أو أليكساندر فليمينج، وعلى إني أنقذت البشرية من كوارث بإختراعي المذهل..وأنا كل اللي عملته إني رصيت اللي قريته بالإنجليزي عن الموضوع، بالعربي على الجروب..إنما يظهر على طريقة إقتلوا المرسال فيه ناس عندها مجدوا المرسال!

فأنا فعلا مش بقول إن ده رد الفعل الوحيد خالص..ده أنا أبقى مفتري…بس ده رد فعل واسع وعجيب.
وبعدبن لما فكرت فيها شوية، قولت أنا عملت “عمل تطوعي” صغير خالص، بجروب على الفيسبوك وكتابه ورسائل، فده اللي شوفته…إنما لما تفكر في اللي بيعملوا عمل تطوعي حقيقي على أرض الواقع، هتلاقيهم بيتضربوا وبيتسجنوا وبيطلع عين اللي خلفوهم..فرضا قوي إنها جات علي قد كده..نحمده ونشكر فضله..وبنعتذر لكل المشمئزين عن تقاعسنا وتخاذلنا في العمل التطوعي وبنبدي خجلنا وبنقدم إعتذاراتنا عن الخدمه المجانية دون المستوى اللي بنقدمها.

Posted by Karim Soliman on Monday, January 16, 2017

انتقل إلى أعلى